Рублнинг қадрсизланиши Алишер Усмоновни Россиянинг энг бой одами мақомидан маҳрум этди » Ўзбекистон янгиликлари – Zamin.uz

Рублнинг қадрсизланиши Алишер Усмоновни Россиянинг энг бой одами мақомидан маҳрум этди

Рублнинг қадрсизланиши Алишер Усмоновни Россиянинг энг бой одами мақомидан маҳрум этди

Жорий ҳафтанинг икки кунида Россиянинг энг бадавлат 20 кишиси 10 миллиард доллар йўқотди, деб ҳисоблаб чиқди “Bloomberg”.

Агентликнинг қайд этишича, бунга РТС индекси 2009 йил мартидан бери энг қуйи даражага тушгани ҳамда рублнинг доллар ва еврога нисбатан қадрсизлангани сабаб бўлган.

“Bloomberg Billionaires” рейтинги маълумотларига кўра, 2014 йил давомида россиялик миллиардер жами 62 миллиард доллар йўқотишган ва эндиликда уларнинг умумий бойлиги 174 миллиард долларга баҳоланмоқда.

Энг кўп НОВАТЭК компанияси раҳбари Леонид Михельсон йўқотишга учраган – унинг бойлиги йил бошидан 8,7 миллиард долларга камайиб, ҳозирда 9,2 миллиард долларга тенг. НОВАТЭКнинг 23,5 фоизига эгалик қилувчи Геннадий Тимченконинг йўқотиши эса 7,8 миллиард долларга тенг бўлиб, ҳозирча унда 3,2 миллиард қолган.

НЛМК пўлат қуйиш гуруҳи раҳбари Владимир Лисин эса йил бошидан бери бойлигининг 42 фоизини (7,5 миллиард доллар) йўқотиб, ҳозирги вақтда 7 миллиард доллар билан рейтингнинг 179-ўрнида бормоқда.

Келиб чиқиши ўзбекистонлик бўлган Алишер Усмонов эса 6,8 миллиард доллар йўқотиб, Россиянинг энг бой одами мақомини 13,6 миллиард доллари бор Виктор Вексельбергга бой берди. Усмонов ҳисобида ҳозирча 13,4 миллиард бор ва у ҳозирги вақтда жаҳоннинг энг бой 69-одами бўлиб турибди.

“Bloomberg”нинг қайд этишича, Алишер Усмонов “Мегафон” алоқа операторининг 20 фоиз акциясига эгалик қилади, бу компаниянинг қиймати эса йил бошидан бери 58 фоизга арзонлашди. Россиядаги акцияларидаги йўқотишлар ўрнини Усмонов Хитойдаги Alibaba ва JD.com интернет-компанияларига киритган сармоялари билан нисбатан қоплаб олган.

Ўзбекистондаги 1 декабрдан фаолиятини бошлаган “МТС” алоқа операторининг бош ҳиссадори ҳисобланган “Система” компанияси раҳбари Владимир Евтушенков эса, фоиз ҳисобида, энг катта йўқотишга учраган. “Башнефть” иши бўйича ҳозирча ҳибсда сақланаётган Евтушенков йил бошидан бери 90 фоиз давлатини (жами 9 миллиард доллар) йўқотган ва Россиянинг энг бой 20 одами рўйхатидан чиқиб кетган.

Йил бошидан бери бойлиги кўпайган ягона рус миллиардери Олег Дерипаска бўлиб турибди. “Русал”нинг 48 фоизи акцияси ҳисобланган Дерипаска ҳозирда 7,5 миллиард доллар эгаси ва жаҳон рейтингида 165-ўринда бормоқда. Бунга “Русал” акцияларининг 101 фоизга ўсгани ва ўз ҳиссадорига 855 миллион доллар даромад келтиргани ҳам сабаб бўлган.

Манба: Kun.uz

Бизни Телеграм орқали кузатиб боринг: https://telegram.me/zaminuz

Рейтинг:
  • Dislike
  • 0
  • Like
Ҳавола:
Рейтинг@Mail.ru