Актриса Муқаддас Холиқова оилаларнинг ажрашишида келинлар ва уларнинг оналарини айблади » Ўзбекистон янгиликлари – Zamin.uz
14-06-2016 | 22:39 ZAMIN.UZ / Маданият / 14 Июн 2016 года
1 575

Актриса Муқаддас Холиқова оилаларнинг ажрашишида келинлар ва уларнинг оналарини айблади

Актриса Муқаддас Холиқова оилаларнинг ажрашишида келинлар ва уларнинг оналарини айблади

“Qalampir” нашри ўзбек киноси ва театрининг ёрқин намоёндаси Ўзбекистон халқ артисти Муқаддас Холиқова билан интервю уйиштирди.

Муқаддас Холиқова журналистнинг “Ўғлингиз йўқлиги армон эмасми?”, деган саволига жавоб берар экан, бугунги кунда ёш оилаларнинг майда муаммолар сабаб ажрашиб кетаётгани масаласига ҳам эътибор қаратди. У бу борада келинлар ва уларнинг оналарини асосий айбдор сифатида кўрсатди.

“Уч қизни вояга етказдик, иккисини узатдик, куёвларимиз ўз ўғлимиздек бўлиб кетишган. Бугун баъзи шўрлик қайноналарнинг ҳолатини, келинларга сўзини ўтказа олмаётгани, тухматга қолаётганини кўриб, Яратган менга ўғил фарзанд бермаганига шукур қилаяпман. Чунки кўп оилаларнинг қизлари ҳали ҳаётга тайёр эмас. Балки, ота-оналар тарбияда хатога йўл қўйишяптими... Тўғри, мен бу гаплар билан қизларимизни қоралаш, оилавий муаммоларда фақат уларни айбдор қилиш фикридан йироқман. Йигитларимизда ҳам камчиликлар йўқ эмас, албатта. Лекин баъзи оилаларда келинлар қайнота ва қайнонани, ҳатто, турмуш ўртоғини ҳам менсимай қўйган.

Яқинда телефонларда тарқалган бир овозли ёзувни эшитиб қолдим. Ҳалиги ёзувда келин қайнонасини чунонан ёмонлаяптики... Атиргулнинг ҳидига ошиқ бўлган одам унинг тиканига ҳам чидаши керак. Ўз онаси билан телефонда суҳбат қураётган келиннинг гапларини эшитиб, тепа сочим тикка бўлди. “Мана эрим келиб тўғри онасининг ёнига кириб кетди, мени ёнимга кирмади ҳам. Атайин хонамда ўтирибман, қани овқатга мени чақиришармикин деб”, дейди ҳалиги келинчак. Гўшакнинг нариги тарафида турган она эса қизини йўлга солиш ўрнига, ишни янада чигаллаштириб, қизини гиж-гижлаяпти в “Майли битта фарзанд туғиб олгин”, деб тасалли беряпти. Қизиқ, ўша она бу билан нима демоқчи?

Тавба, қандай замонларга қолдик? Ўша келиннинг эри нега ишдан келгач, онаси қолиб, хотинининг ёнига кириши керак, қани айтинг? Ўғил боқиб, оқ ювиб, оқ тараб, келинининг қўлига топшириб қўйиш айбми?

Минг афсуски, оиланинг муқаддас эканини унутиб қўйяпмиз. Оила пойабзал эмаски, бу бўлмаса, бошқаси дейилса. Спектакллар, киноларда ўғилларнинг онасини, яъни қайноналарни келинига кун бермайдиган, қилдан қиё қидирадиган қилиб кўрсатиб келинади. Аслида ҳамма айб қизларимизнинг онасида! Оилаларнинг ажралиб кетишига қизларнинг онаси сабабчи бўляпти.

Тўғри, ҳар бир қиз оиласидаги муаммоларни айтиб, уйига йиғлаб келиши мумкин. Шундай пайтда оналар “Бизнинг авлодимизда оиласидан ажрашган чиқмаган, ўша уйдан ўлигинг чиқса чиқадики, тиринг мени уйимга келмайди”, деган гапни айтиши керак. Йўқ, ҳозирги оналар қизига қўшилиб ҳасрат қилади. “Кичкина қорнимга сиққан қизим, катта ҳовлимга сиғмайдими”, деб оилани жар ёқасига олиб келади”, дейди Ўзбекистон халқ артисти Муқаддас Холиқова.

Кўрсатувда давомида актриса анча йиллардан буён дилига тугиб юрган гапларини юзага чиқарди. Ҳамкасби Саида Раметовага оид интернетда тарқалган видеоларга муносабат билдирар экан, бу видеоларни томошабин сифатида тўғри қабул қила олмаганини рўй-рост айтди. Дастурни тез орада эътиборингизга ҳавола этамиз.

Бизни Телеграм орқали кузатиб боринг: https://telegram.me/zaminuz

Рейтинг:
  • Dislike
  • 0
  • Like
Ҳавола:
Рейтинг@Mail.ru