15:39 / 26.10.2016
9 568

Yil oxiriga qadar 512 km avtomobil yo‘llari qayta ta’mirlanadi

Yil oxiriga qadar 512 km avtomobil yo‘llari qayta ta’mirlanadi

O‘zbekiston Iqtisodiyot vazirligi matbuot xizmati 2015–2019 yillarda muhandislik-kommunikasiya va yo‘l-transport infratuzilmasini rivojlantirish va modernizasiyalash dasturining ijrosi yuzasidan ma’lumotlarni taqdim etdi.

«Muhandislik-kommunikasiya va yo‘l-transport infratuzilmasini rivojlantirish hisobiga mamlakatimiz sanoat salohiyati samaradorligini yanada oshirish uchun zarur sharoitlarni yaratish maqsadida O‘zbekiston Respublikasi Birinchi Prezidenti Islom Karimov tomonidan 2015 yil 6 martda 2313-sonli Prezident qarori qabul qilingan. Unda 2015–2019 yillarda muhandislik-kommunikasiya va yo‘l-transport infratuzilmasini yanada rivojlantirish va modernizasiya qilishning ustuvor yo‘nalishlari belgilab berilgan», — deyiladi manbada.

Mazkur qaror bilan qabul qilingan muhandislik-kommunikasiya va yo‘l-transport infratuzilmasini rivojlantirish va modernizasiya qilish dasturi quyidagi maqsad va vazifalarni qamrab olgan:

– iste’molchilarga elektr energiyasini ishonchli tarzda va muntazam etkazib berishni ta’minlashga yo‘naltirilgan, eng avvalo, qishloq joylarda elektr ta’minotining past kuchlanishli taqsimlash tarmoqlari va ob’ektlarini to‘la qamrovda modernizasiyalash;

– mamlakatning iqtisodiyot sohalari va tarmoqlarida ilg‘or axborot texnologiyalari va kommunikasiya tizimlarini, zamonaviy dasturiy mahsulotlarni keng joriy qilish, foydalanuvchilarning internet tarmog‘iga ulanishning texnik imkoniyatlarini oshirish, telefon aloqasi, televidenie va radioeshittirishning raqamli tizimiga to‘liq o‘tkazish;

– temir yo‘llari va havo yo‘llari transportining moddiy-texnik bazasini yanada rivojlantirish va mustahkamlash, yo‘lovchilar va yuklarni tashish bo‘yicha ko‘rsatilayotgan xizmatlar sifatini oshirish, respublikaning yirik shaharlarini o‘zaro tutashtiruvchi zamonaviy yuqori tezlanuvchi elektropoezdlar harakatini yo‘lga qo‘yish, Toshkent shahri va viloyatlar markazlarida aeroport infratuzilmasini qurish va qayta ta’mirlash;

– O‘zbek milliy avtomagistrali tarkibiga kiruvchi avtomobil yo‘llari qismlarini qayta ta’mirlash orqali ularni yuqori xalqaro standartlar talablari darajasiga etkazish;

– respublika aholi punktlarini ichimlik suvi ta’minoti va sanitariya tozalash tizimlarining qamrovini kengaytirish hamda ularni modernizasiya qilish, barcha joylarda ichimlik suv sarfini hisobga olishning avtomatlashtirilgan billing tizimini joriy qilish.

Dastur doirasida 2015–2019 yillarda 150 ta investisiya loyihalari bo‘yicha 9,8 milliard dollar miqdoridagi mablag‘ o‘zlashtirilishi ko‘zda tutilgan.

Dasturning amalga oshirilishi natijasida:

– 5,5 mingdan ziyod transformator punktlari hamda 25 ming kilometrdan ortiq elektr tarmog‘i liniyalari quriladi va qayta ta’mirlanadi;

– milliy mobil aloqa operatori tarmog‘i yaratiladi, 12 ming kilometr optik tolali aloqa tarmog‘i quriladi, kommutasiya markazlari modernizasiya qilinadi, raqamli televidenie tarmog‘ini kengaytirish orqali respublikaning eng chekka hududlarida joylashgan aholi punktlari qamrab olinadi;

– 885 kilometrlik temir yo‘llar elektrlashtiriladi (Samarqand-Buxoro, Maroqand-Qarshi, Qo‘qon-Andijon uchastkalari), ikkita yuqori tezlikda harakatlanuvchi Talgo-250 rusumidagi poezd xarid qilinadi;

– «O‘zbekiston havo yo‘llari» Milliy aviakompaniyasi parki tubdan yangilanib, ikkita «Mi-8 MTV-1» rusumli vertolyot hamda ikkita Boeing-787-800 rusumli samolyot olib kelinadi, Toshkent shahri aeroportida «Toshkent-4» yangi yo‘lovchi terminali quriladi, Termiz va Nukus shaharlari aeroporti binolari qayta ta’mirlanadi;

– Andijondan Qo‘ng‘irotgacha, Samarqanddan Termizgacha, Qarshidan Shahrisabzgacha bo‘lgan yo‘nalishlarda jami 2700 kilometr avtomobil yo‘llari quriladi va qayta quriladi;

– 8600 kilometr ichimlik suv tarmoqlari va 358 kilometr sanitariya tozalash (kanalizasiya) tarmoqlari qayta quriladi va modernizasiya qilinadi.

Bugungi kunga kelib ushbu Dastur doirasida quyidagi ishlar amalga oshirildi:

– Maroqand-Qarshi va Samarqand-Buxoro temir yo‘l uchastkalari elektrlashtirilib, mazkur yo‘nalishlarda yuqori tezlikda harakatlanuvchi elektr poezd qatnovi yo‘lga qo‘yildi;

– «O‘zbekiston havo yo‘llari» Milliy aviakompaniyasi uchun bitta «Mi-8 MTV-1» rusumidagi vertolyot hamda bitta Boeing-787-800 rusumidagi samolyot xarid qilinib, foydalanishga topshirildi;

– 376 kilometr avtomobil yo‘llari qayta ta’mirlandi.

Dasturda belgilangan loyihalarning bajarilishi bo‘yicha joriy yilning oxirigacha quyidagi ishlar amalga oshirish kutilmoqda:

302 transformator punkti va 320 kilometrlik elektr tarmog‘i quriladi; bitta yuqori tezlikda harakatlanuvchi Talgo-250 rusumidagi poezd xarid qilinadi; «O‘zbekiston havo yo‘llari» Milliy aviakompaniyasi uchun ikkinchi Boeing-787-800 rusumidagi samolyot keltiriladi.

Bundan tashqari, 512 kilometrlik avtomobil yo‘llari qaytadan ta’mirlanadi, A-380 avtomobil yo‘lining Buxoro-To‘rtkul yo‘nalishida 125 kilometr, M-39 traktining G‘uzor-Termiz yo‘nalishida 50 kilometr, M-37 traktining Samarqand-Navoiy yo‘nalishida 16,7 kilometr masofadagi yo‘llar qurilishi yakunlanadi.

Dasturlash foundation


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » O‘zbekiston » Yil oxiriga qadar 512 km avtomobil yo‘llari qayta ta’mirlanadi