Аҳмадбойнинг хазинаси топилдими? Тафсилотлар билан танишинг » Ўзбекистон янгиликлари – Zamin.uz

Аҳмадбойнинг хазинаси топилдими? Тафсилотлар билан танишинг

Аҳмадбойнинг хазинаси топилдими? Тафсилотлар билан танишинг

Шу кечаю-кундузда интернет тармоқларида молиявий пирамидага асос солган «Аҳмадбой» томонидан сирли жойга беркитилган улкан хазина (милён-милён долларлару, олтинлар ва жавоҳирлар) қидирилаётгани ҳақидаги янгиликларни зўр қизиқиш, худдики, ўткир сюжетли детективни томоша қилаётгандек кузатмоқда, дейилади "Дийдоразиз" нашрида.

Хазина ростдан ҳам бўлганми ёки Аҳмадбойнинг «абонентлари» Афанди сингари ўзлари ўйлаб топган навбатдаги лофга чиппа-чин ишонишмоқдами? Спутник Ўзбекистон мухбирлари шунга ойдинлик киритишга бел боғладилар.

Спутник Ўзбекистон нашрининг ҳуқуқни муҳофаза қилиш органларидаги ўз манбаси сўзларига кўра, «Аҳмадбой» ҳибсга олинган даврда унинг уйидан топилган нақд пуллар миқдори тахминан 12 миллион долларни ташкил қилган. Бу эса фирибгар томонидан мижозларга етказилган моддий зарар миқдоридан икки-уч марта кам деганидир.

«Фирибгар ҳатти-ҳаракатларидан фуқароларга етказилган зарарнинг умумий миқдорини аниқлаш ҳозир амримаҳол, сабаби аксарият одамлар фирибгарга пул билан бирга ўз машиналари, квартиралари ва қимматбаҳо тақинчоқларини топширганлар. Қолаверса, «жабрдийдалар» ўз аризаларида ҳақиқий суммани кўрсатганми ёки қўшиб ёзганми билиш қийин. Негаки, уларнинг аксарияти, пайтдан фойдаланиб кўпроқ пулни юлиб қолиш мақсадида берган суммаларидан кўпроқ суммани кўрсатаётган бўлишлари ҳам мумкин», — дея ўз фикрини билдирди суҳбатдош.

Унинг айтишича, Аҳмадбойнинг олтин хазинаси ҳақидаги миш-мишлар ҳам анча бўрттирилган.

«Ўзбекистон — бу қуйма олтинларни худдики писта харид қилгандек харид қилиш мумкин бўлган давлатмас. Амалда бундай ишларни амалга оширишнинг иложи йўқ, биргина йўли — олтиндан ясалган тақинчоқларни харид қилиш ва уларни қуйма шаклга келтириш ёки асл ҳолича сақлаш. Аммо катта миқдорда олтин тақинчоқларни харид қилиш — Миллий Хавфсизлик хизмати ходимлари эътиборини тортган бўлар эди.

Аҳмадбойнинг «қора кун»га олиб қўйган пули бўлган, бу табиий.У бежизга халқдан олган пулларни беш йил давомида қайтаришга ваъда бермайди, ахир. Аммо шу билан бирга тезкор гуруҳ ходимлари ўз усуллари ёрдамида фирибгарни пуллар қаерга яширилгани ҳақида гапиртира олмаганига ҳам ишониш қийин. Ҳозирда амалга оширилаётган қидирувлар эса Аҳмадбойнинг хазинасини қидириш эмас, балки фирибгар томонидан исмлари фош қилинган алоҳида мижозлар ва бошқа фирибгарларни қўлга туширишнинг ўзига хос усули бўлиши ҳам мумкин.

Аҳмадбойнинг хазинаси чиндан ҳам мавжуд бўлган тақдирда, у фақат доллардан иборат бўлган ҳамда бегона кўзлардан асраш учун Қозоғистон ёхуд Россияга олиб чиқиб кетилгани аниқ. Бу давлатлардан эса бу пулларни топиш анчайин мушкул иш…

Бизни Телеграм орқали кузатиб боринг: https://telegram.me/zaminuz

Рейтинг:
  • Dislike
  • 0
  • Like
Ҳавола:
Рейтинг@Mail.ru