Ситора Алимжонова: «Севган инсоним бор, аммо…»

Ўзбек санъати кундан-кунга ривожланиб бораётган бир даврда, ёш актрисаларнинг ижоди ва шахсий ҳаёти кўпчилик учун қизиқ бўлиши табиий. Сўнгги пайтларда Шароф Муқимов билан яхшигина гап-сўзлар қуршовида қолган истеъдодли актриса Ситора Алимжонова ҳам шулар жумласидан. Бугунги суҳбатимизда актриса ўзи ҳақидаги баъзи миш-мишларга ойдинлик киритди, деб ёзади Hordiq.uz нашри.
— Санъат оламига кириб келганингизга анча бўлди…
—Худо хоҳласа, ижод қилаётганимга беш йил тўлади. Бунга энг катта сабабчи сифатида туғишган опам, яъни «Кореялик келин» фильми орқали мухлисларга таниш Дилдора Ҳошимовани кўрсатишим мумкин. Ўша пайтларда режиссёр Дурдона Тўлаганова опамга «Кўзлари катта-катта синглингиз бор экан, уни актриса қиласизми?» деган ва опам иккимиз мамнуният билан ушбу таклифни қабул қилганмиз. Шу тариқа дебют ролим Мирмақсуд Охуновнинг «Сен кетма» фильми бўлди.

— Оила аъзоларингиз бунга қандай муносабатда?
— Оила аъзоларим касбимга ижобий қарашади. Бунинг яна бир сабаби, бобом кино олами вакили эди. У санъатни севгани учун ҳам бувим доим «Оиламиздан санъаткор чиқади», дея ният қиларди. Ният холис экан, мана, опам Дилдора Ҳошимова ҳам актрисалик фаолиятини бир мунча вақт олиб борди. Ҳозир у Кореяда яшайди ва «Дилдоранинг салом Кореяси» теледастурида бошловчилик қилади.

— Кимнингдир кўнглини оғритиб қўйганмисиз, бундай дамларда биринчи қадамни ташлай оласизми?
— Албатта, ҳаммамиз ҳам кимнингдир қалбига билиб-билмай озор етказиб қўямиз. Шундай кезларда, агар хатолик мендан ўтганини тушунсам, мулоҳаза қилиб кўраман. Биринчи қадамни ташлашдан уялмайман. Агар аксинча бўлса, мен у инсондан худди шу нарсани кутаман.

— Чет давлатларда тушган аксарият расмларингизга нисбатан «Очиқ-сочиқ кийиняпсиз, йигитлар билан жуда яқин масофада туриб суратга тушяпсиз» каби фикрларни билдиришган…
— Совуқ об-ҳавони хушламаганим сабаб, асосан, иссиқ мамлакатларга бораман. Табиийки, иссиқ шароитда жуда ҳам ёпиқ кийиниш ноқулай ва бироз эркин, енгилроқ кийимларда юргим келади. Балки, шунинг учун ҳам одамларнинг кўзига «очиқ-сочиқ» юргандай кўринарман. Умуман олганда, кийимларим ҳаддан ошгулик даражада эмас, деб ҳисоблайман (кулиб). Йигитлар билан яқин масофада суратга тушганимни эса эслолмайман. Балки, бирон бир актёр, касбдошим билан ёнма-ён тушган суратим бордир.

— Қўшиқ ҳам куйлаб кўрдингиз. Назаримда, хонандалик билан чиқишолмадингиз чоғи…
— Ёшлигимдан қўшиқ айтишни ёқтирганим сабаб, ўзимни бу борада синаб кўрганим рост. Менимча, жуда кўпчилик ёшлигида буни хоҳлайди. Тўғри, аввалига «Энди қўшиқчи бўламан, актрисаликни йиғиштираман», деб ўйладим. Ҳатто продюсерлар билан шартнома тузиб, чиқишолмай қолган пайтларим ҳам бўлди. Лекин энди қўшиқ куйламасам керак.

— «Инстаграм»даги саҳифангизда Сондасом исмли корейс қиз жиянингиз эканини айтгансиз. Асл миллатингиз нима? Қолаверса, ўзингиз ҳам корейс қизларига тақлид қиласиз…
— Кўпчилик ташқи кўринишимни корейсларга ўхшатиши рост. Лекин корейсларга тақлид қилмайман, буни ўйламаганман ҳам. Эҳтимол, Кореяда озми-кўпми яшаганим туфайли уларнинг муҳити менга қайсидир маънода таъсир қилгандир. Сондасом эса жияним, яъни опам Дилдора Ҳошимованинг қизи. Опам корейс йигитга турмушга чиққан.

— Севган инсонингиз бор деб эшитдик, тўй қачон?
— Тўғри эшитибсиз, севган инсоним бор! Лекин муносабатларимиз натижасини вақт кўрсатади. Назаримда «Бир кўришда севдим, ёқтирдим», деб оила қуриш ярамайди. Ахир никоҳ катта масъулият дегани. Бу яхшилаб ўйлаб қарор қилинадиган нозик масала. Умуман олганда, турмушга чиқиш ҳозирча режамда йўқ.

— Яқинда аллақандай лойиҳада иштирок этиб, Шароф Муқимов билан «келин-куёв» бўлдингиз гўё. Бундай тушунарсиз лойиҳалардан мақсад пиарми?
— Бундай лойиҳаларда кўп актёр ва актрисалар, санъаткорлар иштирок этишган. Лекин айнан мен ва Шароф Муқимов ижросидаги лойиҳа анча миш-мишларга сабаб бўлди. Билишимча, ушбу лойиҳадан мақсад ўзбек тўйлари қандай ўтиши, ўзига хос расм-русумларимизни чет мамлакатлардаги одамларга ҳам кўрсатиш бўлган. Ушбу кичкинагина «тўй» интернетга жойлаштирилган. Табиийки, энди буни бутун дунё кўрса бўлади. Лойиҳанинг мақсади ўзбек тўйлари қай тарзда ўтишини янада кенг оммага очиб бериш эди.

— Баъзилар Шароф Муқимов эътибордан четда қолгани учун уни яна бир бор эслатиб қўйишди ва бунга Ситора ёрдам берди, дейишяпти…
— Шароф Муқимов яхши ижодкор. Ўз вақтида жуда катта аудиториядаги мухлисларга эга эди. Фикримча, бундай санъаткорлар осонликча эсдан чиқмайди ва шу сабаб уларни ёдга солиш шарт эмас. Айни шу гап-сўзлардан кейин ҳам Шароф Муқимовнинг мухлислари кўплиги билинди. Қайтариб айтаман, бу шунчаки кичик лойиҳа эди, ҳеч қандай пиар эмас.

— Баъзиларнинг фикрича, ролларингизда сохталик ва бир хиллик кўп эмиш. Бундай фикрларга қандай муносабат билдирасиз?
— Аввало, актрисани бирор роль учун режиссёрлар танлашади. Балки, улар мени айнан бир хил образларда кўришар. Сохталикка келадиган бўлсак, енгил комедияларда озгина ясамалик ишлатилади. Балки, мана шу нарса юқоридаги эътирозларга сабаб бўлаётгандир. Эҳтимол, ўзимга ролларимдаги камчиликларим билинмас. Демак, бу ёғига оғирроқ, жиддийроқ фильмларда роль ижро этишга ҳаракат қилишим лозим. Қолаверса, актриса йилдан-йилга ривожланади. Агар ҳозир ролларимда сохталик сезилаётган бўлса, кейинги фильмларимда хатомни тўғрилашга ҳаракат қиламан. Шубҳасиз, ҳар бир ижодкор учун мухлисларнинг фикри муҳим.

— Яна бир миш-мишга кўра, меҳмонхонада яшар экансиз. Айни шу сабаб сиз ҳақингизда ҳар хил гап-сўзлар тарқалган…
— Мен шу пайтгача ҳеч қачон меҳмонхонада яшамаганман! Аллоҳга шукр, ўз уйим бор. Балки, қайсидир меҳмонхонада бир-икки кун съёмка жараёни ўтаётганида кимдир кўриб, гап чиқаргандир. Лекин мен ҳатто бир кун ҳам меҳмонхонада қолмаганман. Бу гапни биринчи марта эшитиб туришим.

— Келажакдаги режаларингиз…
— Аввалига гўзаллик салони очишга ҳаракат қилдим. Лекин тажрибасизлигим сабабли бу бизнес ўхшамади ва салонни ёпдим. Кейинчалик яна Кореядан мол олиб келдим. Лекин, биласизми, бизнес қилиш учун одамнинг кўнгли бўш бўлмаслиги керак экан. Мени алдаш осон, шу сабаб ҳозир фақат санъат билан шуғулланяпман. Аввалроқ энди клипларда чиқмайман, деб айтгандим, лекин ҳозир фақат санъат йўналишида фаолият юритганим учун яна клипларда суратга тушяпман. Қолаверса, Тошкент Давлат Жаҳон тиллари университетининг учинчи босқич талабасиман. Келажакдаги режаларимга келсак, ўқишни битиргач, ўз йўналишимда кетмоқчиман, ўшанда санъат фақат хобби бўлиб қолади. Худо хоҳласа, чет тилларини ўргатадиган ўқув курси очишни режа қилганман. Балки, фақат шу билан тўхтаб қолмасман, яна ким билади дейсиз? Албатта, куни келиб, оила бекаси деган масъулиятли вазифам ҳам олдинга чиқади. Лекин санъатни ҳеч қачон ташлаб қўймоқчи эмасман.

Блиц саволлар
— Йигит кишида сиз қадрлайдиган энг муҳим уч сифат?
— Биринчи навбатда, эътиборли бўлиши, ваъдасининг устидан чиқиши ва, албатта, содиқ, вафодор бўлиши керак!

— Аниқ таваллуд кунингиз?
— 1992 йил, 1 декабрь.

— Ўзбек эстрадасида сиз мухлислик қиладиган хонанда?
— Лола Йўлдошеванинг ижодини ҳурмат қиламан.

— Қайси таомни зўр тайёрлай оласиз?
— Картошка билан гўшт қовуришни.

— Қайси ёш ўзбек актрисасига айнан қайси роли учун «Ниҳоятда маҳоратли» дея таъриф берган бўлардингиз?
— Юлдуз Ражабовага «Ойқиз эртаги»даги роли учун. Умуман олганда, Юлдуз Ражабова ҳақиқатан истеъдодли актриса.

Моҳигул ДИЁРХЎЖАЕВА суҳбатлашди. “Замин” янгиликларини “Одноклассники”да кузатиб боринг