Чимилдиқдаги шартнома

Ишинг зўр бўлиб, мартабанг чандон кўтарилиб, ташқарида ҳамма сенга таъзимда бўлса-ю, уйингда тинчлик, тотувлик бўлмаса, бари бeкор! Ер куррасида ғимирлаб юрганки одам уйим, болам-чақам деб юради. Кўчадаги ишларини жадаллик билан бажариб, хонадонига югургани югурган. Қизиғи шуки, инсон яхши уйига ҳам, ёмон уйига ҳам талпинаверади. Шунисига қараб, бу уйдан ё бахтли, ё бахтсиз, ё бутун, ё ярим одамлар чиқадилар. «Оила» деб аталган паноҳистонда яхши иқлим яратиш учун эса аёлга аёллик, эркакка эркаклик илми сув, ҳаво қадар зарур!

Ўғлоним, ҳозирги сенга етказадиганим – дастлабки жуда нозик илм, ёдингда тут: эркак кишини асосан қулоғи етаклайди ва уни кўп балоларга гирифтор қилади. Келинчакка чимилдиқда айтадиган биринчи гапинг шу бўлсин:

–«Илоҳим, сиз билан бирга ҳаммамизга саодатли кунлар келаётган бўлсин. Аммо айтиб қўяй, мен оила аъзоларимсиз бир бўлакман, бутунлигим улар билан. Мени дунёга келтирган муаллифларим, тумшуғида сув, дон бериб вояга етказган халоскорларим шу оиламдагилар. Уларнинг пасту баланд феъллари ўзимга аён. Балки биридан севиниб, биридан куйиб юрарман, аммо қандайлигидан қатъий назар, улар менинг мулким, менинг қисматим, маҳримга тушган, ёқмай қолса, кечиб юборолмайман! Ўртага қўядиган биринчи шартим шу: ҳеч қачон жигар-бағриларимни менга ёмонламанг. Сиз туфайли ҳеч биридан кўнглим қолмасин! Қўлингиздан келса, уларни менга иссиқ кўрсатинг, ёмонларимни яхши қилиб беринг! Агар бу илтимосимни бажармасангиз, сиздан икки дунё рози эмасман!»

Мана шу гапни айтиш қўлингдан келсин, ўғлоним!

Манба: Azon.uz “Замин” янгиликларини “Telegram”да кузатиб боринг