10:57 / 17.09.2018
6 245

Кун кулгиси… (марҳум қизиқчи Ҳожибой Тожибоев бисотидан)

Кун кулгиси… (марҳум қизиқчи Ҳожибой Тожибоев бисотидан)
Светофорнинг қизил чироғида янги бой «Мерседес»да келиб тўхтаган экан, орқадан «Запорожец» келиб урилибди. Янги бой жаҳл билан пастга тушибди. «Запорожец» ҳайдовчиси 80 ёшли отахон экан.

— Э, ота, кўзга қараб юрсангиз бўлмайдими? — дебди янги бой. — Қизилда тўхташ керак эди! Нега тўхтамадингиз? Тормозингиз ишлайдими ўзи?

— Йўқ, — дебди қария бўш келмай. — Тормоз 20 йилдан бери ишламайди.

— Хўш, энди нима қиламиз? Қандай тузатиб берасиз машинамни? Кўринг, дабдала қип ташладингиз! Мелиса чақираверайми?

— Мелисани нима қиласан уринтириб? Буёққа юр, ҳозир тўлаб қўяман ўша пулни! Юр, чиқ машинамга!

— Э, ота, бўладиган гапни гапирсангиз-чи! Ўзингиз шалоғи чиққан «Запорожец»да юрибсиз-у, катта гапиришингиз нимаси?

— Тўлайман дедимми, демак тўлайман! Чиқ дедим машинага!

Янги бой энсаси қотиб қариянинг машинасига ўтирибди.

— Сен 80 га кирган одамни камситдинг-а? — дебди қария. — Отангданам катта одамни ранжитдинг-а? Ҳозир кўрасан, тўлайман! Хўш, қанча бўлади?

— Қўйсангиз-чи ота, — дебди кулгиси қистаб янги бой. — Бўладиган гапдан гапиринг!

Қария унга алам аралаш қараб олибди-да, дебди:

— Ҳозир кўрасан! Машинанг-у, уйингминан қўшиб сотволаман ҳозир!

Шундай деб қария қўлига ўриндиқ остидан хум олибди ва оғиз қисмини бир-икки ишқалаб нарига қўйибди. Бир пайт шовқин кўтарилиб, шундоқ тепаларида ҳақиқий жин пайдо бўлибди.

— Ассалому алайкум, хўжайин! — дебди жин икки қўлини кўксига қўйиб. — Хизматингга мунтазирман!

Янги бой бу манзарани кўргандаёқ тамом бўлаёзган экан. Бир қарияга, бир жинга қараб нимадир демоқчи бўлибди-ю, қўрқув устун келибми, гапира олмабди. Қария эса хотиржамлик билан жинга буюрибди.

— Бошланишига бир чойнак аччиқ кўк чой дамла!

— Бош устига, хўжайин!

Жин чой олиб келиш учун кўздан ғойиб бўлиши билан янги бой жонланиб қолибди.

— О-ота, б-бу жин-а? Ҳ-ҳақиқий жинми?

— Ҳа, — дебди қария янги бойга менсимайгина боқиб. — Ростакам жин бу! Кўрдингми? Мени ёмон ранжитдинг локигин, болам!

Янги бойнинг мияси аллақачон бошқа хаёллар билан чирмалиб бўлганди. Нималарнидир ҳисоб-китоб қилиб, ҳовлиққанча қарияга юзланибди.

— Ота, анави ремонтниям, машинамниям қўяверинг! — дебди у. — Ҳа, энди бу яроқсиз бўлса, бошқасини сотиб олавераман. Сиз… Мана шу жинни менга сотмайсизми?

— Жинни-я? Ҳайронман…

— Ҳамма буйруқни бажаради-а?

— Кўрдинг-ку!

— Бўпти, гапнинг дангалини айтинг! Қанча берай? Ҳозир қўнғироқ қиламан, йигитларим мана шу ерга опкелишади пулни!

— Ҳайронман, — дебди қария. — Шу жинга жа ўрганиб қолувдим-да! Қўймадинг-қўймадинг-да! Менданам қайсар болайкансан! Бўпти, 50 милён кўкида берақол!

— Шу холосми?

— Ҳа, шу холос.

Янги бой униси-бунисига қўнғироқ қилиб қария айтган пулларни опкелтирибди. Қария эса хумни янги бойнинг қўлига тутқазибди-ю, пулларни олиб «Запарожец»ида уйига жўнабди.

Янги бой азбаройи хурсандлигидан уйига қандай келганиниям сезмай қолибди. Ичкарига кирибди-ю, хотинини кўздан панароқ хонага етаклаб кирибди ва эшикни ичкаридан тамбалабди.

— Биз ҳозир дунёдаги энг бой одамларга айланамиз, хотин, — дебди ҳовлиқиб. — Мен ҳақиқий жин топиб олдим.

— Вой, алаҳсираяпсизми? Қанақа жин?

— Ҳозир кўрасан.

Янги бой хумнинг оғиз тарафини бир-икки ишқалаган экан, бирдан шовқин кўтарилиб, шундоқ тепасида улкан жин пайдо бўлибди.

— Ассалому алайкум, хўжайин, — дебди жин икки қўлини кўксига қўйиб. — Хизматингга мунтазирман!

Янги бой «Кўрдингми?», дегандек оғзининг таноби қочганча хотинига қараб қўйиб жинга юзланибди.

— Менга бошланишига бир миллиард кўкида ҳозир қил!

— Бунинг иложи йўқ, — дебди жин. — Мени қийнаманг!

— Майли, бир милён доллар пайдо қилиб турақол!

— Сираям иложи йўқ бунинг!

— Ие, нега иложи йўқ? — тутоқиб кетибди янги бой. — Ҳеч бўлмаса мана шу уйимнинг ёнида бунданам ҳашаматлироқ уй пайдо қила оларсан?

— Сираям иложи йў-ўқ! — оғир хўрсинибди жин.

Янги бой бўларича бўлибди. Жинни қайсарга йўйиб… Нима дейишни билмай… Охири сўрабди:

— Вей, тасқара, қариянинг олдида жа уддабурон эдинг-ку!?. Нима келади ўзи қўлингдан?

— Қўлимдан кўк чой дамлаш келади холос, хўжайин!..

Янги бой бу гапни эшитибди-ю, мияси ғувиллаб, боши гир-гир айланиб, юрагида санчиқ туриб кутилмаганда полга юзтубан қулабди.

Манба: Hordiq.uz

Dasturlash foundation


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Ҳаёт учун » Кун кулгиси… (марҳум қизиқчи Ҳожибой Тожибоев бисотидан)