Hyundai Элантра Ҳйбрид моделларида ёнғин хавфи: 55 мингга яқин автомобил қайтариб олинмоқда
Hyundai компанияси АҚШ бозоридаги 2024–2026-йилларда ишлаб чиқарилган 54 337 дона Элантра Ҳйбрид седанларини қайтариб олишини эълон қилди. Муаммо гибрид тизимини бошқариш блокидаги (HPКУ) нуқсон билан боғлиқ бўлиб, у автомобилнинг техник ҳолатига жиддий хавф туғдириши мумкин. Бу ҳақда Ixbt.com хабар беради.
Аниқланишича, HPКУ блокидаги МОСФEТ транзистори юқори юкламалар вақтида қизиб кетишга мойил. Кўп ҳолларда бу автомобилнинг ўт олмаслиги ёки фавқулодда режимга ўтиб қолишига сабаб бўлади. Бироқ, камдан-кам вазиятларда кучли қизиш локал термик шикастланишларга ва ҳатто ёнғин чиқишига олиб келиши мумкин.
Ўтказилган суриштирувлар муаммо аппарат қисмида эмас, балки дастурий таъминотда эканини кўрсатди. Регуляторларнинг маълумотларига кўра, бошқарув тизими HPКУ блокини юклама остида етарли даражада совута олмайди. Компания 2024-йил охиридан бошлаб ушбу носозликни ўрганишга киришган ва бир нечта техник таҳлиллардан сўнг айнан бир компонентнинг мунтазам ишдан чиқишини тасдиқлаган.
Ҳозирги вақтга қадар ушбу нуқсон билан боғлиқ 4 та ҳолат қайд этилган бўлиб, улардан фақат биттасида ёнғин юз берган. Бахтли тасодиф туфайли жароҳатланганлар ёки йўл-транспорт ҳодисалари кузатилмади. Hyundai ушбу муаммони HPКУ дастурий таъминотини янгилаш орқали ҳал қилишни режалаштирмоқда, бу эса совутиш тизими самарадорлигини оширади.
Эслатиб ўтамиз, аввалроқ Hyundai Туксон гибридларида ҳам дастурий хатолик туфайли автомобилларнинг ўз-ўзидан тормозланиши билан боғлиқ муаммолар ҳақида хабар берилган эди. Жанубий Корея бренди гибрид моделлардаги бундай "хом" дастурлар сабабли кетма-кет техник носозликларга дуч келмоқда.
