Россия Украинани миналаштиришда роботлардан фойдаланишни бошлади
Россия Қуролли Кучлари Украинада уруш бўлаётган ҳудудда миналаштириш ишларида «Минер БР-1» комплексидан фойдаланишни бошлади.
Россиялик мутахассислар «Минер БР-1» ер усти робот мажмуасини яратдилар. У аллақачон Россия ҳарбийлари томонидан махсус ҳарбий операция ҳудудида қўлланилмоқда. Бу ҳақда «ТАСС» хабар бермоқда.
«Россия Қуролли Кучлари махсус операция ҳудудида «Минер БР-1» комплексидан фойдаланишни бошлади. Биз еттита платформани етказиб бердик, яна етказиб бериш режалаштирилган», — деди нашр манбаси.
Манбанинг қайд этишича, маълум бир ҳудудга мина ўрнатишда роботни масофадан бошариш мумкин. Комплексдан ўқ-дориларни етказиб беришда ҳам фойдаланса бўлади. «Минер БР-1» 150 килограммгача бўлган юкларни ташишга қодир, аммо энг катта самарадорликка 70 килограммгача бўлган юкларни ташишда эришилади.
