Путин президентлик сайловида номзодини қўйишини расман эълон қилди

Россиянинг амалдаги президенти Владимир Путин янги, бешинчи президентлик муддатига ўз номзодини қўйишини маълум қилди.

У ўз қарорини Кремлда Россия ҳарбийларини тақдирлаш маросимидан кейин, Украинадаги уруш қатнашчиси, ўзини ўзи эълон қилган ДХР «парламенти» спикери Артём Жога билан бўлган суҳбатда эълон қилди.

Россияда президент сайлови 2024 йил 15-17 март кунлари бўлиб ўтади.

Владимир Путин бундан олдин 4 марта президентлик сайловида номзодини қўйган ва барчасида ғалаба қозонган. У 2000 йилдан бери Россияга раҳбарлик қилмоқда.

Унинг амалдаги президентлик ваколати 2024 йил 7 май куни ниҳоясига етади.