АҚШ штатида 14 ёшга тўлмаганларнинг ижтимоий тармоқлардан фойдаланиши тақиқланади

^{Фото: WМNF}
АҚШнинг Флорида штатида 14 ёшга тўлмаган болаларнинг ижтимоий тармоқлардан фойдаланиши тақиқланди. Бу ҳақда Флорида губернатори Рон ДеСантис хабар берди.

“Мен 14 ёшгача бўлган болаларга ота-она розилигисиз ижтимоий тармоқларда аккаунтга эга бўлишни тақиқловчи қонун лойиҳасини имзоладим”, — деди Флорида губернатори.

Таъкидланишича, вояга етмаган болалар ота-онаси рухсатисиз очган ижтимоий тармоқлардаги аккаунтларини ўчириб ташлаши шарт.

“Қонун лойиҳаси болаларни ҳимоя қилишга қаратилган. Давлат органлари ушбу қонунни бузган тармоқ эгаларини судга беришга ва жарималар талаб қилишга тайёрланмоқда”, — деди ДеСантис.

Янги қонун штатда 2025 йил январь ойида кучга кириши режалаштирилган. Мазкур қонунга беш фарзанднинг онаси, конгресс аъзоси Энжи Никсон қарши чиққан. У буни “ҳукуматни суиистеъмол қилиш” деб атаган. Никсон қоидалар ёки қонунлар эмас, балки ота-оналар ўз фарзандларининг Интернетдан фойдаланиши бўйича қарор чиқариши кераклигини айтган.