Зеленский украиналикларнинг сафарбарлик ёшини 27 ёшдан 25 ёшга туширди

^{Фото: Google Images}
Украина президенти Владимир Зеленский сафарбарлик ёшини 27 ёшдан 25 ёшгача қисқартирувчи қонунни имзолади. Ушбу чора Украина Олий Радаси томонидан 2023 йилнинг май ойида тасдиқланган. Қонун Украина парламенти веб-сайтида эълон қилинди.

2023 йилда Украина Мудофаа вазирлиги сафарбарлик ёши чегарасини пасайтириш ташаббуси билан чиққанди. Вазирликнинг таъкидлашича, мамлакатда ҳарбий ҳолат эълон қилинган бўлса-да, 27 ёшга тўлмаган муддатли ҳарбий хизматга чақирилувчиларни ҳарбий рўйхатга олиш зарурати йўқ, ҳар йили тиббий кўрикдан ўтказиш қўшимча маблағ ва молиявий харажатларга олиб келади.

7 февраль куни Олий Рада сафарбарлик тўғрисидаги қонун лойиҳасини биринчи ўқишда қабул қилди. Қонунда электрон чақирувни жорий қилиш, хизматдан бўйин товлаганларга автомобиль ҳайдашни тақиқлаш ва банк ҳисоб-рақамини блокировка қилиш каби чоралар белгиланган.

Иккинчи ўқишга қадар ташаббусга 4 мингдан ортиқ тузатишлар киритилди. Қонун лойиҳасининг дастлабки версияси инсон ҳуқуқларини бузувчи моддалар туфайли парламент томонидан рад этилганди.