Қирғизистонда депутат президентдан 2-3 тонна олтин сўради (видео)
Қирғизистонда иқтисодий масалалар юзасидан яна бир ноодатий таклиф янгради. Мамлакат парламенти депутатларидан бири тадбиркорлар кўрган зарарларни қоплаш мақсадида президентдан бир неча тонна олтин ажратишни сўради. Бу ҳақида News.kg хабар берди.
Унинг сўзларига кўра, мамлакат захирасида етарли миқдорда қимматбаҳо металл мавжуд бўлиб, ундан мақсадли фойдаланиш мумкин. “Жаноб Президент, 2-3 тонна олтин беринг. Ахир бизда 52 тонна олтин бор экан”, — дея мурожаат қилган депутат.
Мазкур таклиф, асосан, турли иқтисодий қийинчиликлар сабаб зарар кўрган тадбиркорларни қўллаб-қувватлаш зарурати билан изоҳланмоқда. Депутат фикрича, бундай чоралар қисқа муддатда бизнес вакилларининг йўқотишларини қоплашга ва иқтисодий фаолликни тиклашга ёрдам бериши мумкин.
Ҳозирча Қирғизистон расмийлари ушбу таклиф юзасидан аниқ муносабат билдирмаган. Бироқ мазкур баёнот ижтимоий тармоқларда кенг муҳокамаларга сабаб бўлиб, турли фикр ва мунозараларни келтириб чиқармоқда.
