«Оскар» мукофоти ғолиблари эълон қилинди

Ҳолливуддаги Dolby Theatre саройида кино оламининг энг нуфузли — «Оскар» мукофотини топшириш маросими бўлиб ўтди.

Ташкилотчилар бу йил илк бор саккиз номинация (пардоз, оригинал мусиқа, саҳналаштириш, овоз, монтаж, қисқа метражли анимацион фильм, қисқа метражли ҳужжатли ва бадиий фильм) ғолибларини тантанали маросим олдидан эълон қилишга қарор қилди.

Бу йил «Оскар» мукофотига жами 38 та асар даъвогарлик қилди. Қуйида асосий номинациялар бўйича ғолибларни таништирамиз.

Операторлик иши ва махсус эффектлар
«Дюна» фильми ушбу номинацияда мукофотни қўлга киритди.

^{«Дюна» фильмидан кадр.}
Дени Вильнёвнинг ушбу филми «Оскар» мукофотига ўнта номинация бўйича номзод бўлди, жумладан, йилнинг энг яхши фильми номига ҳам даъвогарлик қилди. Операторлик иши бўйича «Оскар» мукофоти Грейг Фрейзерга, визуал эффектлар мукофот эса тўрт кишилик жамоага насиб этди.

Мультфилм
Диснейнинг «Энканто» филми тўлиқ метражли анимацион фильм номинациясида «Оскар»ни қўлга киритди.

^{«Энканто» мультфилмидан кадр.}
Иккинчи пландаги рол
Трой Коцур «CODA: кар ота-онанинг фарзанди» фильмида «Иккинчи пландаги энг яхши актёр» номинациясида Академия мукофотига лойиқ топилган бўлса, «Вестсайд тарихи» мусиқий фильми актрисаси Ариана ДеБос «Иккинчи пландаги энг яхши актриса» мукофотига сазовор бўлди.

^{Актриса Ариана ДеБос.}
Энг яхши сценарий
Кеннет Брана «Белфаст» фильми учун оригинал сценарий учун Академия мукофотини қўлга киритган бўлса, «CODA» фильми сценарийси муаллифи ва режиссёри Шан Хейдер «Энг яхши мослаштирилган сценарий» учун тақдирланди.

^{«Белфаст» фильмидан кадр.}
Режиссёрлик иши
Жейн Кемпион «The Power of the Dog» фильми учун «Энг яхши режиссёр» номинациясида ғолиб бўлди.

^{«The Power of the Dog» фильмидан кадр.}
Қўшиқ
Хонанда Билли Айлиш Жеймс Бонд ҳақидаги сўнгги — «Ўлишнинг вақти эмас» фильми учун ёзилган қўшиғига «Оскар» мукофотини қўлга киритди.

^{Билли Айлиш.}
Энг яхши актёр
Уилл Смит «Қирол Ричард» картинасидаги роли учун «Энг яхши актёр» номинациясида Академия мукофоти билан тақдирланди.

^{«Қирол Ричард» фильмидан кадр.}
Энг яхши актриса
Жессика Честейн «Тэмми Фэйнинг кўзлари» фильмидаги ижроси учун «Энг яхши актриса» номинациясида «Оскар» мукофотини қўлга киритди.

^{Америкалик актриса Жессика Честейн.}
Энг яхши фильм
Шан Хейдернинг «CODA» фильми йилнинг энг яхши фильми номинациясида «Оскар» мукофотига лойиқ топилди.

^{«CODA: кар ота-онанинг фарзанди» фильмидан кадр.}