Реал Мадрид мухлислари Алаба ва Карвахаль билан кўз ёшлар остида хайрлашди
Сантиаго Бернабеу стадионида ўтган ҳиссиётларга бой оқшомда Реал Мадрид тарафдорлари Давид Алаба ва Дани Карвахальга муносиб эҳтиром кўрсатишди. Athletic Club устидан қозонилган 4:2 ҳисобидаги ғалаба билан якунланган учрашувда мухлислар Алабанинг машҳур "стул кўтариш" байрамини такрорлашди, Карвахаль эса ўзининг ёрқин фаолиятини якунлар экан, кўз ёшларини тия олмади. Бу ҳақда Goal.com хабар беради.
Австриялик ҳимоячи Давид Алаба 68-дақиқада захирага олинганида, бутун стадион 2022-йилги Чемпионлар лигаси доирасидаги PSJга қарши драматик ғалабадан сўнг урф бўлган анъанани эслатиб, стулларни ҳавога кўтарди. Сўнгги мавсумларда оғир жароҳатлар билан курашган Алаба майдонни тарк этаётиб, клуб раҳбарияти, жамоадошлари ва мухлисларга миннатдорчилик билдирди.
"Бу беш йил давомида кўрсатган меҳрингиз ва қўллаб-қувватловингиз учун раҳмат. Айниқса, тиззамдаги оғир жароҳат вақтида ёнимда бўлганингиз мен учун жуда қадрли. Сизлар ҳамиша қалбимда қоласиз", — деди Давид Алаба РМТВ телеканалига берган интервюсида.
Клуб тарихидаги энг совриндор футболчилардан бири Дани Карвахаль ҳам хайрлашув чоғида ҳаяжонини яшира олмади. Ўнг қанот ҳимоячиси президент Флорентино Перезга Германиядан қайтаргани ва оғир жароҳатидан сўнг 24 соат ўтмай шартномасини узайтиргани учун алоҳида раҳмат айтди. Карвахаль ўз нутқида ота-онаси ва турмуш ўртоғига ҳам миннатдорчилик билдириб, Реал Мадрид ҳамиша ғалаба қозонишда давом этишини таъкидлади.
Ушбу хайрлашув маросими Реал Мадрид тарихидаги олтин даврнинг якунланишини англатувчи рамзий воқеага айланди. Ҳар икки футболчи ҳам клуб музейига кўплаб Чемпионлар лигаси кубокларини тақдим этган афсоналар сифатида Мадридни тарк этишди.
