Уилям Салиба: PSJ ҳали ҳам қўрқинчли, аммо Арсенал ғалабага тайёр
Арсенал ҳимоячиси Уилям Салиба Англия Премер-лигасида ғолиб чиққандан сўнг жамоанинг иштаҳаси янада очилганини ва энди бор эътибор Чемпионлар лигаси доирасидаги PSJга қарши баҳсга қаратилганини маълум қилди. Франциялик футболчи Микел Артета қўл остида қўлга киритилган чемпионлик бу шунчаки бошланиши эканини таъкидлади. Бу ҳақда Goal.com хабар беради.
Салиба Париж клубининг ҳужумкор салоҳиятини юқори баҳолади. Луис Энрике жамоаси таркибидаги Усман Дембеле ва Хвича Кваратсхелиа каби юлдузлар ҳар қандай рақиб учун хавф туғдиришини тан олди. "Улар ўтган йили ҳам қўрқинчли эди, бу йил ҳам шундайлигича қолмоқда. Агар уларни мағлуб этмоқчи бўлсак, 100 фоиз кучимизни ишга солишимиз керак", — деди ҳимоячи.
Шунга қарамай, Салиба Арсенал ҳимоя чизиғига тўлиқ ишонади. Унинг сўзларига кўра, жорий мавсумдаги энг яхши ҳимояга эга жамоа сифатида Лондон клуби бундай даражадаги ҳужумчиларга қарши ўйнашдан завқ олади. Ҳимоячи Будапештда бўлиб ўтадиган учрашувда ғалаба қозониш учун барча имкониятлар мавжудлигини билдирди.
Премер-лигадаги зафар Арсенал учун кетма-кет уч йиллик омадсизликдан сўнг келган узоқ кутилган натижа бўлди. Салиба аввалги мавсумларда иккинчи ўрин билан чекланиш руҳий жиҳатдан оғир бўлганини, бироқ бу тажриба жамоани янада кучлироқ қилганини қўшимча қилди. Эндиликда "тўпчилар" нафақат ички чемпионатда, балки Европа майдонларида ҳам гегемонлик қилишни мақсад қилган.
