Килиан Мбаппе сўнгги 38 йилда фақат Месси ва Роналдо эришган натижани такрорлади
Реал Мадрид ҳужумчиси Килиан Мбаппе Испания чемпионатининг сўнгги турида Атлетик Билбао дарвозасини ишғол қилиб, кетма-кет иккинчи марта "Piчичи" совринини қўлга киритди. Франциялик юлдуз ушбу натижаси билан Ла Лигада сўнгги 38 йил ичида фақат Криштиано Роналдо ва Лионель Месси уддалаган ноёб кўрсаткични такрорлашга муваффақ бўлди. Бу ҳақда Goal.com хабар беради.
Мавсум якунига кўра, Килиан Мбаппе 25 та гол билан тўпурарлар пойгасида ғолиб чиқди. У Маллорка ҳужумчиси Ведат Муриқи (23 гол) ва Осасуна вакили Анте Будимирни (17 гол) ортда қолдирди. Барселона аъзолари Ферран Торрес ва Ламине Ямал эса мавсумни 16 тадан гол билан якунлашди. Шунингдек, Мбаппе 63 та зарба билан лигада энг кўп хавф солган футболчи бўлди.
Мбаппе Реал Мадрид сафида 2014 ва 2015-йилларда кетма-кет тўпурар бўлган Криштиано Роналдодан кейин ушбу совринни ҳимоя қила олган илк футболчига айланди. Ўтган мавсумда 31 та гол урган ҳужумчи, бу йил ҳам ўзининг юқори савиясини намойиш этди. Ла Лига тарихида бундай барқарорликни фақат саноқли афсоналар, жумладан Лионель Месси кўрсата олган.
Мавсумнинг сўнгги ўйини Сантиаго Бернабеу стадионида ҳиссиётларга бой хайрлашувлар билан ҳам ёдда қолди. Дани Карвахаль ва Давид Алаба Мадрид клубидаги фаолиятини якунлаб, мухлислар билан хайрлашишди. Жамоа бу мавсумда бирорта ҳам соврин юта олмаган бўлса-да, Мбаппенинг шахсий ютуқлари клубнинг келажакдаги режалари учун муҳим пойдевор бўлиб хизмат қилади.
Эндиликда Реал Мадрид мухлислари эътибори янги даврга қаратилган. Жамоага Хосе Моуриньо бош мураббий сифатида қайтиши кутилмоқда. Португалиялик мутахассис олдида Килиан Мбаппе ва Винисиус Жуниор ўртасидаги мувозанатни топиш ҳамда жамоани яна йирик ғалабалар сари етаклаш вазифаси турибди.
