Тоттенхем Англия Премер-лигасида ўз ўрнини сақлаб қолди
Шимолий Лондонда ўтган асабий баҳсда Тоттенхем жамоаси Эвертон устидан 1:0 ҳисобида ғалаба қозониб, Англия Премер-лигасидаги ўрнини расман сақлаб қолди. Роберто Де Зерби шогирдлари ушбу ғалаба эвазига қуйи лигага тушиб кетиш хавфидан бутунлай қутулишди. Бу ҳақда Goal.com хабар беради.
Учрашувнинг биринчи бўлими мезбонларнинг тўлиқ устунлигида ўтди. Конор Галлагҳер ва Кевин Дансо ўйин бошида қулай имкониятлардан фойдалана олмаган бўлсалар-да, танаффусга икки дақиқа қолганида Жоау Палиньи ҳисобни очди. Унинг бош билан йўллаган зарбаси устунга тегиб қайтди, бироқ такрорий уринишда ярим ҳимоячи тўпни дарвоза чизиғидан ўтказишга муваффақ бўлди.
Иккинчи бўлимда Эвертон тўп назоратини ўз қўлига олган бўлса-да, Тоттенхем ҳимоясини ёриб ўтишда қийналди. Фақатгина ҳакам томонидан қўшиб берилган вақтда Тйриқуе Георге ҳисобни тенглаштириши мумкин эди, бироқ дарвозабон Антонин Кинскй ажойиб сейв намойиш этиб, жамоасининг муҳим ғалабасини сақлаб қолди.
Ушбу натижа Лондоннинг бошқа бир клуби — Вест Хем учун аянчли якунланди. "Болғачилар" Лидс Юнайтед устидан ғалаба қозонганларига қарамай, Тоттенхемнинг уч очкоси уларни Чемпионшипга равона қилди. Роберто Де Зерби жамоаси эса келаси мавсумда ҳам элитада иштирок этиш ҳуқуқини қўлга киритди.
Ўйин қаҳрамонларидан бири Кевин Дансо ҳимояда ишончли ҳаракат қилиб, рақиб ҳужумчиларига деярли имкон қолдирмади. Жоау Палиньи эса нафақат ғалаба голи, балки майдон марказидаги фаоллиги билан ҳам ажралиб турди.
