Портлашдан бир неча сония олдин: SpaceX Starship В3 қўнишидан кадрлар

Starship В3 ўта оғир ракета ташувчисининг илк парвозидан бир кун ўтиб, SpaceX компанияси парвознинг асосий лаҳзалари акс этган юқори сифатли фотосуратларни эълон қилди. Тақдим этилган суратларда кема Ҳинд океанига қўнишидан бир неча сония олдинги ҳолати муҳрланган. Бу ҳақда Ixbt.com хабар беради.

Эслатиб ўтамиз, кема белгиланган нуқтага муваффақиятли етиб келган, бироқ сувга қўнгач, ён томонига ағдарилиб портлаб кетган эди. Шунингдек, SpaceX янгиланган Raptor 3 двигателлари ҳамда Starship С39 ва Super Heavy Б19 қурилмаларининг "қанотлари"дан олинган суратларни ҳам улашди.

Компания вакилларининг таъкидлашича, Starship ва Super Heavy В3 бортига ўрнатилган модернизация қилинган камералар парвознинг ҳар бир босқичини Starlink тизими орқали 4К форматида узатиш имкониятига эга. Бу эса тадқиқотчиларга парвоз жараёнини мисли кўрилмаган аниқликда кузатиш имконини беради.

Starship лойиҳасининг 12-синов парвози ва Starship В3 учун дебют миссияси қисман муваффақиятли деб топилди. Бироқ, ФАА (АҚШ Федерал авиация бошқармаси) Super Heavy тезлаткичининг бўлаклари "хавфли ҳудудга" тушганини маълум қилиб, ҳодиса юзасидан ўз хавотирларини билдирди.