Kriptovalyuta egalariga jismoniy hujumlarning 70 foizi Fransiyada sodir boʻlmoqda
Bitcoin jurnalisti Joe Nakamoto taqdim etgan hisobotga koʻra, raqamli aktivlarni oʻgʻirlash maqsadida kriptovalyuta egalari va ularning oilalariga qilinadigan jismoniy hujumlarning (wrench attacks) qariyb 70 foizi Fransiyada yuz bermoqda. Maʼlumotlarga koʻra, 2026-yil boshidan buyon ushbu mamlakatda kripto bilan bogʻliq 41 ta oʻgʻirlab ketish holati qayd etilgan, bu esa har ikki yarim kunda bitta hujum sodir boʻlayotganini anglatadi. Bu haqda Cointelegraph.com xabar beradi.
Nakamoto bunday hujumlar koʻpayishini KYC (mijozni tanish) maʼlumotlarining toʻplanishi bilan bogʻlamoqda. Markazlashgan serverlarda saqlanadigan ushbu maʼlumotlar bir necha yirik sizib chiqishlar, jumladan, 2020-yilda Ledger apparat hamyonlari provayderining mijozlar bazasi buzib kirilishi oqibatida jinoyatchilar qoʻliga tushgan. Ushbu sizib chiqish butun dunyo boʻylab 270 000 dan ortiq mijozning shaxsi, uy manzili va elektron pochtasini fosh qilgan.
Casa kompaniyasi rahbari Jameson Loppning taʼkidlashicha, kripto hamjamiyatida KYC maʼlumotlarini yigʻishga qarshi norozilik kuchaymoqda. Raqamli aktiv egalari jismoniy hujumlar va oʻgʻirlab ketishlar nishoniga aylanayotgani sababli, xavfsizlik choralarini kuchaytirish zarurati tugʻilmoqda. Hujumlar odatda xorijda yashaydigan jinoyatchilar tomonidan tashkillashtirilib, Fransiyadagi yoshlar ijrochi sifatida yollanmoqda.
Ekspertlar foydalanuvchilarga xavfsizlikni taʼminlash uchun maxsus kastomial xizmatlardan foydalanishni tavsiya qilmoqda. Bunday xizmatlar hujum paytida aktivlarni muzlatib qoʻyish va huquq-tartibot idoralarini ogohlantirish imkonini beradi. Shuningdek, hujumchilarni chalgʻitish uchun ichida oz miqdorda mablagʻ boʻlgan "yolgʻonchi" hamyonlarni saqlash ham samarali usul sifatida koʻrsatilgan.
