FTX ishi: Fenwick & West yuridik firmasi jabrlanuvchilarga 54 mln dollar toʻlaydi
Sobiq FTX kriptovalyuta birjasiga maslahat bergan asosiy yuridik firma — Fenwick & West LLP 2023-yilda mijozlar tomonidan berilgan jamoaviy daʼvoni hal qilish uchun 54 million dollar toʻlashga rozi boʻldi. Daʼvogarlarning taʼkidlashicha, ushbu firma FTX tomonidan amalga oshirilgan firibgarlik sxemalarida muhim rol oʻynagan va noqonuniy harakatlarga koʻmaklashgan. Bu haqda Cointelegraph.com xabar beradi.
Silikon vodiysida joylashgan ushbu yuridik firma bankrot boʻlgan FTX birjasiga mijozlar mablagʻlaridan notoʻgʻri foydalanishni yashirishda yordam berganlikda ayblanmoqda. Xususan, Fenwick & West mablagʻlarni aralashtirib yuborish, jumladan, birja va uning savdo boʻlinmasi Alameda Research oʻrtasidagi oʻtkazmalarni yashirish uchun maxsus yuridik tuzilmalar va strategiyalarni ishlab chiqqan.
Shuningdek, yuridik maslahatchilar FTX uchun pul oʻtkazmalari litsenziyalarini olish majburiyatidan qochish imkonini beruvchi sxemalarni yaratishda ishtirok etgan. Fenwick & West dastlab daʼvoni rad etishga harakat qilgan boʻlsa-da, fevral oyida kelishuvga erishishga qaror qildi. Endilikda ushbu kelishuv AQSH sudyasi tomonidan tasdiqlanishi kerak.
Ushbu kelishuv 2022-yilda FTX birjasining qulashi bilan bogʻliq huquqiy jarayonlarning navbatdagi bosqichidir. Mazkur inqiroz butun kripto sanoatiga kuchli zarba bergan va AQSH regulyatorlari hamda qonun chiqaruvchilari tomonidan sohani qattiqroq nazorat qilishga sabab boʻlgan edi.
Hozirda FTX Recovery Trust aktivlarni kreditorlar va mijozlarga tarqatish bilan shugʻullanmoqda. Biroq, koʻplab mijozlar Trust faoliyatidan norozi boʻlib, aktivlar juda past narxlarda sotilganini daʼvo qilmoqda. Masalan, 2023-yilda Cursor sunʼiy intellekt kompaniyasidagi 5 foizlik ulush 200 ming dollarga sotilgan, holbuki 2026-yilga kelib ushbu ulushning qiymati 3 milliard dollarga yetgan edi.
