Fed va Donald Trump kriptovalyutalarni toʻlov tizimiga integratsiya qilmoqda
AQSH Federal rezerv tizimi (Fed) oʻtgan yilning dekabr oyida eʻlon qilingan taklifni yangilab, "skinny" master-hisobvaraqlarini yaratish boʻyicha yangi loyihani taqdim etdi. Shu bilan birga, Prezident Donald Trump raqamli aktivlarni mavjud toʻlov tarmoqlari bilan yanada kengroq integratsiya qilishni nazarda tutuvchi ijrochi farmonni imzoladi. Ushbu qadamlar kripto-sanoatning federal moliya tizimiga kirib borishini tezlashtirishi kutilmoqda. Bu haqda Coindesk.com xabar beradi.
Donald Trump tomonidan imzolangan farmonlar hukumatga amaldagi qoidalarni yangilash va kriptovalyutalarni toʻlov tizimlariga integratsiya qilish vazifasini yuklaydi. Shuningdek, Gʻaznachilik departamenti va regulyatorlarga Bank sirini saqlash toʻgʻrisidagi qonun (BSA) doirasidagi nazoratni kuchaytirish topshirildi. Bu chora-tadbirlar noqonuniy transchegaraviy moliyaviy faoliyat va soliqdan boʻyin tovlash holatlariga qarshi kurashishga qaratilgan.
Fed tomonidan taqdim etilgan yangilangan taklif fintech va kripto-kompaniyalarga toʻliq bank litsenziyasiga ega boʻlmasdan turib, markaziy bankning toʻlov infratuzilmasidan foydalanish imkonini beradi. Hujjatda ushbu muassasalarning toʻlov tizimlariga kirish tartibi batafsil bayon etilgan. Biroq, bu jarayonni toʻliq amalga oshirish uchun AQSH Kongressi tomonidan tegishli qonunchilik bazasi yaratilishi talab etilishi mumkin.
Yangi tartibga koʻra, regulyatorlar fintech firmalarining tartibga solinadigan tashkilotlar bilan hamkorlik qilishiga toʻsqinlik qilayotgan qoidalarni qayta koʻrib chiqadi. Fed aʻzosi boʻlgan banklar esa sugʻurtalanmagan depozit muassasalariga toʻlov hisobvaraqlarini mustaqil ravishda taqdim etish imkoniyatlarini baholaydilar. Bu kripto-aktivlarning anʻanaviy iqtisodiyot bilan bogʻlanishida muhim burilish nuqtasi boʻlishi mumkin.
