Anasxon Rahmatov O‘zbekistonning g‘alaba qozonishiga nima yetishmaganini aytdi

O‘zbekiston futzal terma jamoasi a’zosi Anasxon Rahmatov JCH-2024 1-turidan o‘rin olgan Niderlandiyaga qarshi o‘yindan so‘ng saytimizga intervyu berdi.

- O‘yin haqida
- Birinchi o‘yin har doim qiyin bo‘lgan. Bugun ham shunday holat takrorlandi. O‘yin so‘ngida mag‘lubiyatdan qutulishni uddaladik. Muxlislar so‘nggi lahzalargacha qo‘llab-quvvatlashdi.

- Bugungi natija o‘yinga mos bo‘ldimi? Natijadan ko‘nglinigiz to‘ldimi?
- Yo‘q, sababi har bir jamoa turnirni g‘alaba bilan boshlashni xohlaydi. Biroq mag‘lubiyatni durangga aylantira olganimiz yaxshi bo‘ldi.

- Jamoaning g‘alaba qozonishiga nima yetishmadi?
- Tarkibda yoshlar ko‘p edi. Menimcha, tajriba yetishmadi.

- Jamoa yutqzayotgan paytda O‘zbekiston bosh murabbiyi taym-ayt oldi, shundan so‘ng hakam hushtagi chalinishi arafasida uchinchi gol urildi. Murabbiy qanday ko‘rsatmalar berdi?
- Murabbiy barchani xotirjamlikka chaqirdi. Gol ura olishimiz, o‘zimizga ishonishimiz kerakligini uqtirdi va buni uddaladik.

- \"Humo arena\"ga tashrif buyurgan muxlislarning o‘rni qanday bo‘ldi?
- Ularning o‘rni katta edi, ayniqsa, yutqazayotganimizda bizga dalda berib turishdi. Qiyin holatlarda muxlislardan motivatsiya olishga harakat qildik.