Fransiya chempionatida yangi yetakchi – Lans

PSJ jamoasi shanba kuni Monakoga 0:1 hisobida magʻlub boʻldi. Ushbu magʻlubiyatdan soʻng Marsel jamoasi Liga 1 peshqadamligini qoʻlga kiritish imkoniyatiga ega edi, ammo ular Tuluzaga qarshi oʻyinda 2:2 hisobida durang oʻynab, ushbu imkoniyatni qoʻldan boy berishdi.

Yakshanba kuni esa Lans jamoasi birinchi oʻrinni egallash uchun ajoyib imkoniyatga ega boʻldi. Marseldan farqli oʻlaroq, Lans oʻz imkoniyatidan samarali foydalandi.

Ular safarda Anjeni 2:1 hisobida magʻlub etishdi. Ushbu gʻalabaga Florian Tovenning dubl gollari sabab boʻldi.

Mazkur gʻalaba Lans jamoasi uchun Fransiya chempionatidagi ketma-ket toʻrtinchi muvaffaqiyat boʻldi. Endilikda Lans Liga 1 musobaqasining yangi yetakchisiga aylandi.

PSJ bir ochko ortda qolayotgan boʻlsa, Marsel esa ikki ochkolik farq bilan uchinchi oʻrinda bormoqda. Bu mavsumda chempionlik uchun kurashda qiziqarli voqealar boʻlishi kutilmoqda.