Latsio to'qqiz kishi bilan Parma ustidan g'alaba qozondi

A Seriyasining 15-turida Parma o'z maydonida Latsioni qabul qildi. Uchrashuv unchalik sermahsul bo'lmadi: jamoalar darvozaga qariyb o'ntadan zarba yo'llagan bo'lsa-da, real xavfli vaziyatlar kam kuzatildi.

42-daqiqada Latsio o'yinchi Mattia Dzakkanyi Nauel Estevesga nisbatan qo'polligi uchun maydondan chetlatildi. 77-daqiqada rimliklar yana bir futbolchisidan ayrildi: Toma Bashich raqibga orqadan tashlangan hujum va hakamga aytilgan noo'rin so'zlar sabab qizil kartochka oldi.

Shunga qaramay, to'qqiz kishi bo'lib qolgan Latsio g'alabani ilib ketdi. 82-daqiqada Tijjani Noslin raqibdan to'pni olib qo'yib, aniq zarba bilan uchrashuvdagi yagona golni urdi — 0:1.

Bu natijadan so'ng Latsio 22 ochko bilan turnir jadvalida 8-o'ringa ko'tarildi. Parma esa 14 ochko bilan quyi qismda qolmoqda va pastdan to'rtinchi o'rinni bo'lishib turibdi.