Ter Shtegen yanvarda Barselonani tark etmaslikka qaror qildi

Kataloniyaning Barselona klubi darvozaboni Mark-Andre ter Shtegen yanvar oyidagi transfer oynasida jamoasini o'zgartirish niyatida emas. Bu haqda Marca nashri xabar berdi.

Ma'lumotlarga ko'ra, tajribali golkiper joriy mavsumda o'yin amaliyoti yetishmasligini keskin his qilmoqda. Bosh murabbiy Hans-Diter Flik boshchiligidagi murabbiylar shtabi esa asosiy tanlovni Joan Garsiyaga qaratgan.

Shunga qaramay, ter Shtegen mavsum yakuniga qadar Barselonada qolishga tayyor. Nemis futbolchisining ko'k-anorranglilar bilan amaldagi shartnomasi 2028 yil yozigacha mo'ljallangan.

33 yoshli darvozabon 2014 yil yozidan beri katalon grandida to'p surib keladi. Transfermarkt portali uning bozor qiymatini 7 million yevroga baholamoqda.