Federiko Bernardeski olti haftaga safdan chiqdi

Bolonya klubi jamoaning hujumkor yarim himoyachisi Federiko Bernardeski Italiya Superkubogi yarim finalida Interga qarshi uchrashuvda o'mrov suyagini sindirib olganini ma'lum qildi. 19-dekabr kuni Saudiya Arabistonining Ar-Riyod shahrida bo'lib o'tgan bahsning asosiy vaqti 1:1 hisobida yakunlandi.

Shundan so'ng Bolonya penaltilar seriyasida 4:3 hisobida ustun kelib, final yo'llanmasini qo'lga kiritdi. Yaqin dushanba kuni bo'lib o'tadigan finalda jamoa Napoli bilan to'qnash keladi.

Klub bayonotiga ko'ra, Bernardeskiga jarrohlik amaliyoti kerak bo'ladi va u seshanba kuni o'tkazilishi rejalashtirilgan. Futbolchi taxminan olti hafta maydondan chetda qoladi va shu bois Superkubok finalida jamoasiga yordam bera olmaydi.

Bernardeski joriy mavsum 22 o'yinda 4 ta gol urgan.