APLda bir kunda uchta golsiz durang qayd etildi

1-yanvar kuni Angliya Premyer-ligasining 19-turi doirasida to'rtta uchrashuv o'tkazildi va ularning uchtasi 0:0 hisobidagi durang bilan yakunlandi. Bu haqda euro-football.ru xabar beradi.

OptaJoe ma'lumotiga ko'ra, APL tarixida bir kunning o'zida to'rtta o'yin bo'lib, shundan uchtasi golsiz durang bilan tugashi bor-yo'g'i ikkinchi marta ro'y berdi. Bunday holat avval 2010-yil 11-aprelda kuzatilgan, o'shanda faqatgina «Manchester Siti» — «Birmingem» bahsi sermahsul bo'lib, 5:1 hisobida yakunlangan.

Bugun Premyer-ligada o'yinlar rejalashtirilmagan. Navbatdagi uchrashuvlar 3-yanvar kuni bo'lib o'tadi. Hozirda 19 turdan so'ng 45 ochko jamg'argan londonlik «Arsenal» chempionat jadvalida peshqadamlik qilmoqda.