Nepomnyashchiy Safonovni yosh futbolchilarga namuna deb atadi

Rossiyalik murabbiy Valeriy Nepomnyashchiy «PSJ» darvozaboni Matvey Safonovni yosh futbolchilar uchun ibrat sifatida ko'rsatdi. Bu haqda euro-football.ru xabar beradi.

Nepomnyashchiyning ta'kidlashicha, Safonovning Parij klubida asosiy darvozabonga aylangani quvonarli holat. Murabbiy Matvey uzoq vaqt o'yin amaliyotisiz qolgan bo'lsa-da, taslim bo'lmagani va maydondagi ishonchli o'yini bilan o'zini to'liq isbotlaganini aytdi. Bu fikrlarni «RB Sport» keltirdi.

26 yoshli posbon joriy mavsum Fransiya Ligasida 4 ta uchrashuvda maydonga tushib, 3 ta gol o'tkazib yubordi. Yana 2 o'yinda u darvozasini daxlsiz saqlab qoldi. Shuningdek, Safonov Chempionlar Ligasida 2 bahsda ishtirok etib, 1 ta gol o'tkazdi.

Safonovning fransuz grand bilan amaldagi shartnomasi 2029 yilning o'rtalarigacha mo'ljallangan.