Suchich Inter mag‘lubiyatidan so‘ng xotirjamlikka chaqirdi

Milanning “Inter” klubi yarim himoyachisi Petar Suchich Chempionlar ligasida “Bude-Glimt”ga qarshi o‘yindan keyin fikr bildirdi. Norvegiyaliklar kutilmaganda 3:1 hisobida g‘alaba qozondi. Bu haqda euro-football.ru xabar beradi.

“O‘yinning o‘zi og‘ir kechdi, ayniqsa raqib o‘z maydonida juda kuchli. Natija biz uchun yomon bo‘ldi. Bu kecha omadsiz o‘tdi, biroq xotirjamlikni saqlashimiz va uyda g‘alaba qozonishimizga ishonishimiz kerak”, — deya Suchichning so‘zlarini UEFA rasmiy sayti keltirdi.

Musobaqaning umumiy bosqichi yakunlariga ko‘ra “Inter” 8 uchrashuvda 15 ochko jamg‘arib, jadvalda 10-o‘rinni egalladi. “Bude-Glimt” esa 9 ochko bilan undan 12 pog‘ona pastda joylashdi.

Javob uchrashuvi 24 fevral kuni bo‘lib o‘tadi.