Ronaldu 30 yoshdan keyin 500 gol marrasidan oshdi

«Al-Nasr» hujumchisi Krishtianu Ronaldu 30 yoshdan keyingi gollari sonini 500 taga yetkazdi. Bu haqda euro-football.ru xabar beradi.

Portugaliyalik futbolchi Saudiya Arabistoni chempionatining shanba kungi «Al-Hazm»ga qarshi o‘yinida 13-daqiqada hisobni ochdi va bu uning 30 yoshdan o‘tganidan keyingi 500-goli bo‘ldi. Uchrashuv yakuniga yaqin Ronaldu yana bir bor raqib darvozasini ishg‘ol qilib, ushbu ko‘rsatkichni 501 taga chiqardi.

Umumiy hisobda Ronaldu faoliyati davomida 964 ta gol urgan. Shunday qilib, u to‘plarining asosiy qismini so‘nggi 11 yil ichida kiritgan.

Saudiya ligasining joriy mavsumida 41 yoshli hujumchi 20 marta gol urdi. U to‘purarlar poygasida Ayven Toni (23) va Xulian Kinones (21)dan keyin uchinchi o‘rinda bormoqda.