Ruy Koshta Benfika tarixi inklyuzivlik namunasi deydi
Lissabonning «Benfika» klubi prezidenti Ruy Koshta jamoa futbolchisi Janluka Prestianni atrofida yuzaga kelgan mojaro yuzasidan munosabat bildirdi. Bu haqda euro-football.ru xabar beradi.
Prestianni Madridning «Real» klubi hujumchisi Vinisius Juniorga nisbatan irqchilik qilganlikda ayblanmoqda. Shu sabab futbolchi Yevropa Chempionlar ligasidagi 1 o'yinga vaqtincha chetlatildi, yakuniy intizomiy qaror esa keyinroq e'lon qilinadi.
«Benfika» butun tarixi davomida irqchilik emas, inklyuzivlik timsoli bo'lib kelgan. Prestianni irqchi emas. Agar u shunday bo'lganda, bu klubda to'p surmagan bo'lardi. «Benfika» tarkibida hech qachon irqchilarga o'rin bo'lmaydi», — deya Koshtaning so'zlarini Record nashri keltirdi.
Chempionlar ligasi doirasida «Real» va «Benfika» o'rtasidagi javob uchrashuvi 25 fevral kuni bo'lib o'tadi. Dastlabki bahsda madridliklar 1:0 hisobida g'alaba qozongan.
