Konrad Laimer Uli Hoeneßning tanqidlariga hazil bilan javob qaytardi
Bavariya Germaniya kubogi finalida VfB Stuttgart ustidan 3:0 hisobida gʻalaba qozonib, "oltin dubl"ni rasmiylashtirgach, jamoa yarim himoyachisi Konrad Laimer ajoyib kayfiyatda jurnalistlar bilan suhbatlashdi. Doping-nazorat xonasida uzoq qolib ketgan avstriyalik futbolchi kiyinish xonasidagi bayram tantanalariga ulgurmagan boʻlsa-da, klub faxriy prezidenti Uli Hoeneß bilan bogʻliq vaziyatga hazil aralash munosabat bildirdi. Bu haqda Goal.com xabar beradi.
Avvalroq Uli Hoeneß Chempionlar ligasi yarim finali oldidan Laimerning maosh borasidagi talablarini ochiqchasiga tanqid qilib, uni yuqori baholashini, ammo u "Maradona emasligini" taʼkidlagan edi. Maʼlumotlarga koʻra, 28 yoshli futbolchi amaldagi 10 million yevrolik maoshini 15 million yevroga koʻtarishni istamoqda. Laimer esa bu borada shunday dedi: "Uli bilan har doim bir toʻlqinda boʻlganmiz, bu muammo emas. Men hali hech narsa soʻraganim yoʻq, lekin koʻramiz, voqealar rivoji qanday kechar ekan".
Futbolchi Myunxen klubida oʻzini baxtli his qilayotganini va jamoa bilan yana koʻplab sovrunlar yutish niyatida ekanini bildirdi. Shartnomani uzaytirish borasidagi muzokaralar davom etayotgan bir paytda, u yangi bitim qachon imzolanishi haqida aniq maʼlumot bermadi. "Futbolda hamma narsa tez oʻzgaradi. Balki ertaga, balki Jahon chempionatidan keyin imzolarman", — deya qoʻshimcha qildi yarim himoyachi.
Suhbat yakunida Konrad Laimer oʻzining moliyaviy talablari oshishi mumkinligiga shama qilib, kulgi koʻtardi. "Balki Avstriya terma jamoasi bilan Jahon chempionatida gʻolib chiqarmiz — u holda mening narxim yanada qimmatlashadi", — deya hazil qildi Bavariya yulduzi.
