Futzal. O‘zbekiston terma jamoasi Argentinaga mag‘lub bo‘ldi

Argentina va O‘zbekiston futzal terma jamoalari o‘rtasidagi o‘rtoqlik uchrashuvi o‘z nihoyasiga yetdi. \"Polideportivo Municipal el Limon\" stadionida kechgan bahsda termamiz 1:3 hisobida mag‘lub bo‘ldi.

Argentina safidagi gollarga Konstantino Vaporaki, Matias Edelesteyn va Lukas Bolo Alemani mualliflik qildi. Jamoamiz safidagi yagona golni Davron Choriyev o‘z nomiga yozdirib qo‘ydi.

Eslatib o‘tamiz, jahon chempionatiga tayyorgarlik ko‘rayotgan Bahodir Ahmedov shogirdlarini oldinda Portugaliya va Kosta-Rikaga qarshi o‘rtoqlik o‘yinlari kutmoqda.