Google hamkori Xreal aqlli koʻzoynaklar sanoatida inqilob qilmoqchi
Aqlli koʻzoynaklar sanoati uzoq vaqtdan beri Silikon vodiysining ushalmas orzusi boʻlib kelmoqda. Gʻoya juda jozibali: odamlar kun boʻyi smartfonlariga termulib oʻtirmasdan, yuzlariga yengil hisoblash qurilmasini taqib yurishsa kifoya. Biroq, soʻnggi oʻn yillikda bu soha ulkan investitsiyalar sarflangan, ammo deyarli foyda keltirmagan moliyaviy "qora tuynuk"ka aylandi. Bu haqda Techcrunch.com xabar beradi.
Google kompaniyasining uzoq yillik hamkori boʻlgan Xreal asoschisi va bosh direktori Chi Xu Mountain Viewdagi Google I/O konferensiyasida oʻzining yangi Project Aura loyihasini taqdim etdi. Uning soʻzlariga koʻra, hozirda sohadagi barcha kompaniyalar zarar koʻrmoqda, chunki qulay va ijtimoiy jihatdan maqbul qurilma yaratish oʻta murakkab vazifadir. Shunga qaramay, Xu sanoat yangi burilish nuqtasiga yetganiga ishonadi.
Ushbu oʻzgarishlarga Meta va Ray-Ban hamkorligida chiqarilgan muvaffaqiyatli modellar turtki boʻldi. Xreal kompaniyasining yangi Aura modeli OLED displeylar bilan jihozlangan boʻlib, foydalanuvchilarga yuqori aniqlikdagi videolarni bevosita koʻzoynakda tomosha qilish imkonini beradi. Qurilma maxsus kichik hisoblash blokiga sim orqali ulanadi, bu esa koʻzoynakning oʻzini yengil va ixcham saqlashga yordam beradi.
Aura foydalanuvchilari Google Maps ilovasidan immersiv tarzda foydalanishlari, YouTube videolarini VR formatida koʻrishlari va qoʻl harakatlarini kuzatish texnologiyasi yordamida gologrammalar yaratishlari mumkin. Kompaniya ushbu qurilma pishiriq tayyorlashda retseptlarni havoda koʻrsatish, qahvaxonalarda shaxsiy ish maydonini yaratish yoki uyda virtual katta ekranda film tomosha qilish uchun ideal ekanini vaʼda qilmoqda.
