Avstraliyalik 138 kilo vaznga ega ayol qanday semirganini, keyin qanday ozganini aytib berdi

  • 29 yanvar 2019, 23:38
  • 2 609
  • Dunyo
  • Avstraliyalik 138 kilo vaznga ega ayol qanday semirganini, keyin qanday ozganini aytib berdi
    Avstraliyaning Melburn shahrida yashovchi Marni Benni (Marnie Benney) yaqin-yaqinlarda ham 138 kilogramm vaznga ega edi. Oʻzining tan olib aytishicha, bu vaznga soʻnggi ikki yil ichida ega chiqqan. Chunki ovqatlanish masalasida talabi dunyocha edi. Ayol tan olib aytdiki, bir haftada 450-500 Avstraliya dollari miqdoridagi pulni fastfud, fish-end-chips hamda Xitoy lapshasiga sarflagan. Mahsulotlarni internet orqali buyurtirgan. Ularni uyiga eltib berishgan. Bundan tashqari, Marni kuniga uch litr shakarsiz gazli ichimlik ichgan. Asabiylashsa, shirinliklarsiz, qovurilgan tuxummi, kolbasami, ishqilib shularsiz tinchlana olmagan.

    — Men ertalab nonushta qilmasdim, tushlikdan voz kechardim, — deydi uning oʻzi. — Uyga kelgach, bir dunyo fastfudga buyurtma berardim-da, boʻkib qolguncha yerdim…

    47 yoshli bu ayolga oʻzining semizligi yoqmasdi albatta. Koʻp marotaba fitnes, boshqa sport turlari bilan shugʻullanish uchun toʻgaraklarga yozilgan. Ammo bir-ikki marta qatnagach, erina boshlagan-u bormay qoʻygan.

    Ammo hamma narsaning boshi va oxiri boʻlganidek, kunlarning birida vrach koʻrigidan oʻtdi-yu, dahshatga tushib qoldi. Vrachning aytishiga qaraganda, agar zudlik bilan sogʻlom turmush tarzini boshlamasa, infarkt yoki insultga uchrashi tayin ekan. Juda boʻlmaganda qandli diabetning 2- turiga uchrarkan.

    Qoʻrqmay ham boʻpti. Ayol oyogʻi kuygan tovuqdek tipirchilab qoldi-yu!..

    Toʻgʻri, dastlabki ikki oyda Benni mustaqil ravishda egilib, krossovkasining bogʻichlarini bogʻlay olmay yurdi. Shunga qaramay, murabbiy koʻnglini koʻtarib, bogʻichlarni boylashda, yechishda yordamlashib turdi. Qarabsizki, 11 oy deganda 70 kilogramm vazn tashladi. Yugurish marafonida ilk bor boshqalar qatori toʻliq yugurib oʻta oldi.

    Benni shu kunlarda oʻzini juda yaxshi his etmoqda va dunyoda undan baxtliroq inson yoʻqdek quvonib yashamoqda. Shu bilan birga dunyodagi semizlikdan qiynalayotganlarga nima qilib boʻlmasin, ozishni maslahat bermoqda.

    Manba: Hordiq.uz

    » » Avstraliyalik 138 kilo vaznga ega ayol qanday semirganini, keyin qanday ozganini aytib berdi