Avstraliyada yuzdan koʻproq qiz zoʻrlab turmushga berilgani aniqlandi

  • 12 fevral 2019, 10:25
  • 3 271
  • Dunyo
  • Avstraliyada yuzdan koʻproq qiz zoʻrlab turmushga berilgani aniqlandi
    Avstraliya politsiyasi voyaga yetmagan qizlarni majburiy nikohlash bilan bogʻliq 100 dan koʻproq holatni tergov qilmoqda. Qizlardan baʼzilari 6 yoshga ham toʻlmagan boʻlgan.

    Mutaxassislarning fikricha, bu raqamlar aysbergning uchi boʻlishi mumkin. UNSW Youth Law Australia (YLA) direktori Metyu Kilining izoh berishicha, nikoh qurishga majburlanuvchi bolalar yordam soʻrab murojaat qilishga qoʻrqadilar. Boshqa hollarda esa qizlar bor haqiqatni oshkor qilsalar, ota-onalari qamoqqa joʻnatilishlari mumkinligidan xavotirlanadilar.

    Bunday holatlar Avstraliyaning har bir shtatida, biroq eng koʻp miqdorda Yangi Janubiy Uelsda aniqlangan. Misol uchun, 15 yoshli Serena ismli qiz ota-onasi uni boshqa davlatdagi keksa qarindoshiga “oila rishtalarini saqlab qolish” uchun turmushga bermoqchi boʻlganda oʻz joniga qasd qilmoqchi boʻlgan.

    Hozirda Avstraliya tashqarisida qancha qiz turmushga chiqishga majburlanayotgani nomaʼlumligicha qolmoqda. YLA bunday kelishuvlar qurbonlariga vaziyatga eʼtibor jalb qilish uchun aeroportlarda baqirishni tavsiya qilmoqda.

    Avstraliya qonunlariga koʻra, 18 yoshga toʻlmagan shaxsni turmush qurishga majburlash 7 yilgacha ozodlikdan mahrum qilish bilan jazolanadigan jinoyat hisoblanadi. Baʼzi hollarda sud orqali nikoh qurish yoshi chegarasini 16 yoshgacha pasaytirishga erishish mumkin.

    » » Avstraliyada yuzdan koʻproq qiz zoʻrlab turmushga berilgani aniqlandi