13:43 / 08.11.2019
3 036

Rossiya Alisher Usmonovga tuhmat qilishda ayblanayotgan jurnalistni xalqaro qidiruvga beradi

Rossiya Alisher Usmonovga tuhmat qilishda ayblanayotgan jurnalistni xalqaro qidiruvga beradi
Rossiyalik tergovchilar Interpolga “Rosbalt” nashri jurnalisti Aleksandr Shvarevni qidiruvga berish va hibsga olish haqida hujjatlar tayyorlashdi. Jurnalist tuhmat qilish va tamagirlikda ayblanmoqda. Bu haqda “Interfaks” nashriga vaziyatdan xabardor manba xabar berdi.

Ta’kidlanishicha, ayni vaqtda Shvarev Latviya poytaxti Rigada davolanmoqda.

“Ayni vaqtda tergovchi tomonidan Shvarevni xalqaro, jumladan Latviya hududida qidiruvga berish va uni hibsga olish bo‘yicha choralar ko‘rish qarori chiqarilgan. Yaqin orada hujjatlar Interpolga jo‘natiladi”, deb ma’lum qilgan manba.

Uning ta’kidlashicha, Rossiya huquq-tartibot idoralari shuningdek latviyalik hamkasblariga jurnalistni hibsga olish va uni Rossiyaga ekstraditsiya qilish haqida so‘rov yuborishni rejalashtirmoqda.

Bundan avvalroq politsiya Shvarevga rossiyalik milliarder Alisher Usmonovga tuhmat qilish hamda qozog‘istonlik tadbirkor, “Fincraft Resources” xoldingi direktorlar kengashi raisi Kenes Rakishevdan 3 mln rubldan ko‘proq (50 ming dollar) pul talab qilish ayblovlarini qo‘ygan. Birinchi ayblov bo‘yicha jurnalistga 5 mln rubllik jarima solinishi yoki 480 soatgacha majburiy ishlar belgilanishi, ikkinchi ayblov bo‘yicha esa 15 yillik qamoq jazosi tayinlanishi mumkin.

Tergovga ko‘ra, Shvarev Alisher Abdullayev ismli shaxs (u ham xalqaro qidiruvga berilgan) bilan birga 2018 yil iyulidan oktyabrigacha bir necha saytlarda go‘yoki Usmonovning og‘ir jinoyatlarga aloqadorligi haqida yolg‘on axborotni joylashtirgan. Politsiyaning o‘rnatishicha, bu ma’lumotlar haqiqatga mos emas va yolg‘on, sha’nga dog‘ tushiruvchi hamda tadbirkorning obro‘siga futur yetkazuvchi va unga ma’naviy zarar yetkazuvchi hisoblanadi.

Bundan tashqari, Shvarev Abdullayev va yana bir necha kishi bilan birga turli saytlarda qozog‘istonlik tadbirkor Rakishevni firibgarlikda, jinoiy guruhlar bilan aloqadorlikda va boshqa jinoyatlarda ayblab, u haqida obro‘sizlantiruvchi axborot joylashtirgan. Ular tadbirkor vakillarining bu ma’lumotlarni o‘chirib tashlash haqidagi iltimosini bajarish uchun 50 ming dollar talab qilishgan, aks holda tadbirkor haqida yolg‘on axborot tarqatishni davom ettirish bilan tahdid qilishgan.

Shvarevning advokati ayblovni yasama deb hisoblashini, jurnalistning jinoiy ta’qib qilinishini esa buyurtma asosida amalga oshirilayotganini aytgan.

“Ayblov mutlaq konkretlashtirilmagan, yasama va asosga ega emas, virtual ayblov deb aytish mumkin”, deb aytgan advokat.
Uning ta’kidlashicha, jurnalist o‘ziga qo‘yilayotgan ayblovlarni tan olmayapti.
Moskvaning Tver sudi 11 noyabrda Shvarevning sirtdan hibsga olinishi haqidagi da’vo arizasini ko‘rib chiqadi.

arenda kvartira tashkent


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » Dunyo » Rossiya Alisher Usmonovga tuhmat qilishda ayblanayotgan jurnalistni xalqaro qidiruvga beradi