Qulupnay: foydasi, zarari, tanlash qoidalari

Mana, bozorlarda qulupnayxon hukmronligining ilk kunlari ham boshlandi. Bu paytda eru ko‘kni egallagan qizil rangli xushta’m mevani sevib tanovul qilmaydigan inson bo‘lmasa kerak. Uning foydali va zararli xususiyatlari haqida to‘liqroq ma’lumotga ega bo‘lishni istasangiz, ma’lumotlarimizga e’tibor qarating.

Tanlash qoidalari

1. Mevalar malikasi qulupnayni tanlaganda uning bandiga e’tibor qarating, chunki yam-yashil bandlar «Meni endigina uzib keltirishdi, olsangiz, aslo yanglishmasiz» deya «so‘z»lab turadi.
2. Shuningdek, meva yuzidagi donlarni ham nazardan chetda qoldirmang. Agar donlar mevadan bo‘rtib chiqqan bo‘lsa, demak, qulupnay hali etilmaganidan dalolat beradi. Ancha chuqur kirgan donlar esa ayni muddao.
3. Ko‘pchilik orasida katta hajmdagi qulupnaylarga kimyoviy dorilar bilan ishlov berilgan degan qarashlar mavjud. Aslida mevaning hajmi uning naviga bog‘liq. Ba’zi turdagi qulupnaylar katta, boshqalari kichik bo‘lishi mumkinligini inobatga oling.
4. Agar qulupnay saqlangan idishda qizil dog‘ qolsa, bilingki, unga kimyoviy dorilar bilan ishlov berilmagan.
5. Qulupnay qanchalik muattar ifor taratsa, mevasi shuncha g‘arq pishgan hisoblanadi.

Ozmoqchimisiz?

Ortiqcha vazndan xalos bo‘lishga kirishganlar uchun qulupnay benazir yordamchidir. 100 gramm qulupnay mevasida atigi 30 kkal. bo‘lsa-da, mazali va to‘yimliligi uchun uni juda qadrlashadi. Xuddi shuncha miqdordagi qulupnay S darmondorisiga bo‘lgan kundalik ehtiyojingizni bemalol qondira olarkan.

Ajinlardan qutqaradi!

Tarkibidagi S darmondorisi tufayli qulupnay chehrangizda ortiqcha ajinlar paydo bo‘lishiga to‘sqinlik qiladi. Bilsangiz, nordon qulupnay oddiylariga qaraganda ko‘proq yoshartirish xususiyatiga ega. Mevadan yuz uchun niqoblar tayyorlashga erinmasangiz, uzoq muddat ajinlar sizni chetlab o‘tadi.

Muhabbat mevasi

U nafaqat yurak shakliga yaqin bo‘lgani uchun, balki tarkibidagi ruh moddasi hisobiga tabiiy afrodiziak (ehtirosni qo‘zg‘atuvchi) meva hisoblanadi. U organizmda gormonlar ishlab chiqarilishini rag‘batlantiradi.

Oshqozonni himoyalash uchun

Injiq fe’l-atvorli bu xonimni ba’zi xastaliklarga chalinganlar iste’mol qilmaganlari maqsadga muvofiq. Oshqozon ichagi biroz bezovta qiladiganlar ehtiyot bo‘lganlari ma’qul. Va albatta, allergiyaga moyil har qanday inson qulupnay sotiladigan joylardan bir chaqirim uzoqdan o‘tmasalar, xastalik osongina salomatliklariga zahmat etkazishi ham mumkin.

Qulupnayni smetana, yog‘siz qaymoq yoki tvorog bilan iste’mol qilgan afzal. Chunki ushbu sut mahsulotlari tarkibidagi yog‘lar oshqozon devorini qoplab oladi va kislotalarning oshqozonga ziyon etkazishiga yo‘l qo‘ymaydi. Bundan tashqari, sut mahsulotlari bilan iste’mol qilingan qulupnay tishlarga ham ziyon etkazmaydi.

Qulupnay oshqozonda bijg‘ish jarayonini keltirib chiqarganligi tufayli ovqatdan keyin desert sifatida tanovul qilish tavsiya etilmaydi.

Mumkin emas!

Agar oshqozon yarasi yoki gastrit bezovta qilsa, ishtahangizni jilovlashga majbursiz. Yaxshisi bananga ixtiyor berganingiz ma’qul.
Qon bosimiga qarshi dori vositalaridan foydalanayotgan bo‘lsangiz, buyragingizni asrash uchun qulupnayni haddan ziyod iste’mol qilmang.

Yodingizda tuting!

Qulupnay mevasini uzoq muddat saqlab bo‘lmaydi. Muzlatkichda ko‘proq saqlab qo‘ysangiz, tarkibidagi nitritlar — kanserogen moddalarga aylanib, salomatligimizga xavf solishi mumkin. “Zamin” yangiliklarini “Facebook”da kuzatib boring