Pul baxtsizlik keltiradi… (yoxud amerikalik erkakning sirli sandiqdagi baxti)

Yaqinda Amerikaning Kaliforniya shtatida ko‘z ko‘rib quloq eshitmagan hodisa yuz berdi. Bir odam ulkan temir sandig‘ini arzongarovga sotib yuborgandi. Sandiq kimoshdi savdosi tashkilotchilarining qo‘liga tushdi va ular temir sandiqni kimoshdi savdosiga qo‘yishdi. Savdo uzoq cho‘zilmadi ham. Amerikalik erkak bu sandiqni 500 dollarga sotib oldi. Uyiga kelib ochgach esa dahshatdan joni chiqayozdi. Ne ko‘z bilan ko‘rsinki, temir sandiqning ichida oz emas, ko‘p emas, 7,5 million dollar pul bor edi.

Ammo juda tez kunda temir sandiqning sobiq egasi paydo bo‘ldi va pullarni qaytarib berishini talab qila boshladi. Aslida Kaliforniya qonunlariga ko‘ra, kim neni sotib olsa, ichidagi ashqol-dashqollari bilan o‘shaniki hisoblanadi. Hech kim bu qonunga qarshi bora olmaydi. Biroq temir sandiqning yangi egasi insof-diyonatli chiqib qoldi. 1,5 million dollar suyunchi puli evaziga qolgan pullarni berib yubordi.

Shu voqeadan so‘ng internetda minglab odamlar erkakning tutgan ishini muhokama qilishdi. Birovlar uni bo‘shang va ahmoqqa chiqardi. Lekin aksar odamlar uni oqladi. Aytishdiki, birovning omonati, ayniqsa, puli rozi-rizolik bilan qo‘lga kiritilmagan bo‘lsa, harom hisoblanarkan. Bunday pullar hech qachon baxt keltirmas ekan. Erkakka sandiqning sobiq egasi chin ko‘ngildan chiqarib bergan 1,5 million dollar esa rosmana baxt hadya etadi. Negaki, bu pullarni halol qilib oldi.

Manba: Hordiq.uz “Zamin” yangiliklarini “Twitter”da kuzatib boring