Umra-2017 Ramazon mavsumi boshlandi. Bugun ziyoratchilarning dastlabki guruhi Saudiya Arabistoniga uchib ketdi

Bugun, 13 iyun kuni o‘zbekistonlik ziyoratchilarning 205 nafardan iborat dastlabki guruhi Toshkent – Jidda – Toshkent yo‘nalishi bo‘ylab Saudiya Arabistoni Podshohligiga umra amallarini bajarish uchun uchib ketdilar, deya xabar beradi Din ishlari bo‘yicha qo‘mitaning Xalqaro aloqalar bo‘limi.

Joriy yilning 13 iyun kunidan 29 iyun kuniga qadar o‘zbekistonlik fuqarolarni umra ziyoratiga kuzatish va kutib olish rejalashtirilgan.

Ramazon mavsumida ziyorat 10 kunni tashkil etadi. Ziyoratchilar Madina shahrida 3 kun, Makkada esa 7 kun bo‘ladilar. Ziyoratchilarga mavsum davomida o‘zbekistonlik 4 nafar ishchi guruhi, 13 nafar guruh rahbari (ellikboshi), 3 nafar shifokor va 2 nafar oshpaz xizmat ko‘rsatadi.

Barcha ziyoratchilar markazlashgan tibbiy punktlarda meningit va grippga qarshi zardob bilan emlandi.

O‘zbekistonlik ziyoratchilar istiqomat qilishlari uchun Madina shahrida «Masjidi nabaviy»dan 100 150 metr masofada joylashgan to‘rt yulduzli «Nur al-Mavadda» mehmonxonasi, Makka shahrida esa «Xaram masjidi»dan 500 550 metr uzoqlikdagi «Abroj al-Meridian» mehmonxonasi tayyorlab qo‘yilgan.

“Umra-2017” Ramazon mavsumida jami 672 nafar fuqarolarimiz umra ibodatini ado etishlari rejalashtirilgan. “Zamin” yangiliklarini “Vkontakti”da kuzatib boring