20:39 / 13.11.2018
6 009

O‘zbekistonda 60 ming AQSh dollari miqdorida ish haqi belgilandi. Kimlarga?

O‘zbekistonda 60 ming AQSh dollari miqdorida ish haqi belgilandi. Kimlarga?
Prezidentimizning “O‘zbekiston Respublikasi hududida xorijiy davlatlarning malakali mutaxassislari tomonidan mehnat faoliyatini amalga oshirishi uchun qulay shart-sharoitlar yaratish chora-tadbirlari to‘g‘risida”gi qarori qabul qilindi.

Qaror bilan malakali chet ellik mutaxassislar mehnat faoliyatini amalga oshirish uchun qulay sharoitlar yaratish, yurtimizning investitsiyaviy jozibadorligini oshirish va uni mutlaqo yangi pog‘onaga ko‘tarish, raqobatdosh mehnat resurslarini jalb qilishni rag‘batlantirish bo‘yicha bir qator yangi qoidalar joriy etilmoqda.

Xo‘sh, ular nimalardan iborat?

Jumladan, yurtimizda yuqori malakali mutaxassislar, deb xalqaro reytingda birinchi 1000 talikka kiradigan oliy ta’lim muassasalarini bitirgan, mutaxassisligi bo‘yicha 5 yildan kam bo‘lmagan ish tajribasiga ega chet el fuqarolari tan olinadigan bo‘ldi. Ularga O‘zbekiston Respublikasida yiliga 60 ming AQSh dollaridan kam bo‘lmagan summada ish haqi belgilanadi.

Malakali mutaxassislar, deganda esa oliy ma’lumotli, mutaxassisligi bo‘yicha kamida 5 yillik ish tajribasiga ega chet el fuqarolari tushuniladi. Ularning yillik oylik maoshi miqdori kamida 30 ming AQSh dollarini tashkil etishi mumkin.

Agar ushbularni O‘zbekistonning xorijlik mutaxassislarga talabi, deb qabul qiladigan bo‘lsak, tabiiyki, ish bajaruvchining ham o‘ziga yarasha shartlari bo‘ladi. Qarorda ayni shu shartlarga javob bo‘ladigan imtiyozlar ham o‘z ifodasini topgan.

“Masalan, ular ko‘p martalik mehnat vizasini olish huquqiga ega bo‘ladi. Qolaversa, viza muddati tugagan taqdirda O‘zbekiston hududidan chiqmasdan turib, viza uchun qayta murojaat qilishlari mumkin. Yana bir qulaylik shuki, ularning oila a’zolariga ham yashashlari uchun tegishli viza hujjatlari rasmiylashtiriladi. Mabodo yuqori malakali xorijiy mutaxassis ob’ektiv sabablarga ko‘ra, jalb qilingan korxonada ishlay olmasa, unga 30 kun ichida O‘zbekiston Respublikasi hududida boshqa korxona topib, o‘sha yerda ishlashiga imkon beriladi” — deydi O‘zbekiston Respublikasi Bandlik va mehnat munosabatlari vazirining birinchi o‘rinbosari Erkin Muhitdinov.

Shuningdek, hujjatda xorijlik malakali mutaxassislarning O‘zbekistonda mehnat faoliyatini olib borishi va investitsiyalarni jalb etishi uchun yana ko‘plab imtiyozlar belgilangan.

Dasturlash foundation


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » Jamiyat » O‘zbekistonda 60 ming AQSh dollari miqdorida ish haqi belgilandi. Kimlarga?