Nodavlat OAV: muhokamalar va e’tibor markazida

  • 22 noyabr 2018, 17:55
  • 2 168
  • Jamiyat
  • Nodavlat OAV: muhokamalar va e’tibor markazida
    Kuchli davlatdan — kuchli fuqarolik jamiyati sari


    Poytaxtimizda O‘zbekiston elektron ommaviy axborot vositalari milliy assotsiatsiyasi (O‘zEOAVMA), O‘zbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondining mablag‘larini boshqarish bo‘yicha parlament komissiyasi, “Taraqqiyot strategiyasi” markazi, O‘zbekiston yoshlar ittifoqi Markaziy Kengashi hamkorligida “O‘zbekiston nodavlat ommaviy axborot vositalari: rivojlanish bosqichlari va kelajak istiqbollari” mavzuida xalqaro konferensiya, Yoshlar media-forumi, “Ozod yurt to‘lqinlari” XI an’anaviy media-festivali g‘oliblarini taqdirlash marosimi o‘tkazildi.

    O‘zEOAVMA tashkil etilganining 15 yilligiga bag‘ishlangan xalqaro konferensiyada O‘zbekiston Respublikasi Oliy Majlisi Senati a’zolari va Qonunchilik palatasi deputatlari, davlat va jamoat tashkilotlari, O‘zbekiston Respublikasida akkreditatsiyadan o‘tgan diplomatik korpus va xalqaro tashkilotlar vakillari, shuningdek, mamlakatimizda faoliyat yurituvchi ommaviy axborot vositalari hamda O‘zEOAVMAga a’zo nodavlat teleradiostansiyalar xodimlari qatnashdi.

    Konferensiyada yurtimizda kuchli davlatdan kuchli fuqarolik jamiyati sari dadil qadamlar tashlanayotgani ta’kidlandi. Nodavlat ommaviy axborot vositalarining mustaqilligini mustahkamlash, erkin va samarali faoliyat yuritishi va rivojlanishi uchun zarur shart-sharoitlarni yaratish masalalari, shuningdek, ularning demokratik huquqiy davlat va ochiq fuqarolik jamiyati qurilishidagi roli muhokama qilindi. Bu borada mamlakatimizda amalga oshirilayotgan ishlar, erishilayotgan yutuqlar, istiqboldagi vazifalar hamda sohaga doir xalqaro tajriba bo‘yicha ma’ruzalar tinglandi.

    Yoshlar media-forumida O‘zEOAVMA hamda O‘zbekiston yoshlar ittifoqi Markaziy Kengashi hamkorligi natijalari, 2019 yilda amalga oshiriladigan loyihalar taqdimoti o‘tkaziladi.

    “Ozod yurt to‘lqinlari” XI an’anaviy media-festivali “Kelajak — bugundan boshlanadi” shiori ostida tashkil etildi. Yoshlar zamonaviy uslubda yangicha ko‘rinishdagi chiqishlari bilan ishtirok etdi. Festivalda milliy jurnalistika rivojiga munosib hissa qo‘shayotgan nodavlat teleradiouzatuvchilarning eng yaxshi ijodiy va texnik xodimlari “Innovatsion yondashuv uchun”, “Oilaviy qadriyatlar doim trendda”, “Tezkor, aniq va batafsil”, “Markazda yoshlar”, “Hududda yetakchi”, “O‘zEOAVMAning eng yaxshi media loyihalari” nominatsiyalari bo‘yicha takdirlandi. Shuningdek, “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi ijrosini yoritishda faol hamkorligi uchun”, “Nodavlat teleradiouzatuvchilar rivojiga qo‘shayotgan hissasi uchun”, “O‘zEOAVMA bilan ishonchli va uzoq yillik hamkorligi uchun”, “Bolalar va yoshlar yo‘nalishidagi faol hamkorlik uchun”, “O‘zEOAVMA bilan samarali ijtimoiy sheriklik uchun” nominatsiyalari bo‘yicha esa hamkor tashkilotlar aniqlandi.

    G‘oliblarga “Ozod yurt to‘lqinlari” statuetkasi, diplom va qimmatbaho sovg‘alar topshirildi.
    Dilshod KARIMOV

    Manba: "Xalq so‘zi"

    Facebook орқали авторизация
    Ma'lumot

    Посетители, находящиеся в группе Гости, не могут оставлять комментарии к данной публикации.
    » » Nodavlat OAV: muhokamalar va e’tibor markazida