Prezident yuk va yoʻlovchi tashish tizimiga oid yangi qaror imzoladi

Oʻzbekiston Respublikasi prezidenti “Yuk va yoʻlovchi tashish tizimini tubdan takomillashtirish chora-tadbirlari toʻgʻrisida”gi qarorni imzoladi.

Hujjat bilan Transport vazirligi, Ichki ishlar vazirligi, Adliya vazirligi va “Oʻzstandart” agentligining 2019 yil 1 iyuldan eʼtiboran quyidagilarni bekor qilish toʻgʻrisidagi takliflariga rozilik berildi:

a) xalqaro tashuvlarda foydalaniladigan shatakchi avtomobillarga litsenziya kartochkalarini berish uchun davlat bojini toʻlash tartibi;

b) quyidagilarni majburiy sertifikatlash:
- “Yevro-5” va “Yevro-6” ekologik sinflari talablariga javob beradigan, Yevropa ittifoqi mamlakatlarida ishlab chiqarilgan hamda olib kiriluvchi yangi yuk va maxsus avtotransport vositalarni, shuningdek, yuklarni avtomobil transportida tashish uchun tirkama va yarim tirkamalarni;
- transport-ekspeditorlik xizmatlarini;

v) yoʻlovchilarni tashish uchun foydalaniladigan avtotransport vositalarida nazorat-kassa apparati mavjudligi toʻgʻrisidagi talabni, agar chek berilishi yoki yoʻlovchi safarini elektron roʻyxatga olish imkoniyati mavjud boʻlsa;

g) malaka talablariga muvofiqlik uchun attestatsiyadan oʻtish toʻgʻrisidagi talab:
- avtomobil transportida yuk tashish bilan shugʻullanadigan yakka tartibdagi tadbirkorlar;
- korxona shtatida avtotransport vositalari ekspluatatsiyasi va tashuvlar xavfsizligini taʼminlash uchun masʼul boʻlgan mutaxassis alohida birligi mavjud boʻlganda, shuningdek, belgilangan tartibda attestatsiyadan oʻtganda, yuridik shaxsning rahbari;

d) avtomobil transportida yoʻlovchilar va yuklarni tashish boʻyicha faoliyatni amalga oshirish uchun litsenziya olishda yuridik shaxslar balansida avtotransport vositalarining mavjudligi toʻgʻrisidagi talab. “Zamin” yangiliklarini “Twitter”da kuzatib boring