Shoir hofiz haqida: "Ortiq Otajonov Gulsara ayasiz bu dunyoda yasholmadilar"

Shoir Muhammad Ismoil 17 may kuni vafot etgan hofiz Ortiq Otajonov haqida xotiralari bilan o‘rtoqlashdi.

"Inson harqancha dovruqli, harqancha zabardast bo‘lmasin u bir chimdimgina mehrga hamisha zor ekan. U o‘zi tog‘day yuksalib tursada, zarracha mehrga muhtoj, zarracha mehrga ilhaq, zarracha mehr oldida bo‘yin egib turar ekan.

Turmush o‘rtog‘i Gulsara Otajonova vafot etgandan so‘ng, Ortiq Otajonovni bu dunyoda hech narsa ushlab turolmadi. Meni Gulsara chaqirayapti,- dedilar bir kun Ortiq aka. – Usiz men bu dunyoni ko‘taraolmayman. – U bilan urishardim, u bilan janjallashar edim, lekin uning uchun yashardim, uni xursand qilish uchun butun dunyoni uning oyoqlari ostiga tashlar edim. U ketdi, men uchun dunyo huvillab qoldi. Qaysi tomonga qarasam, menga uning ko‘zlari ko‘rinib turadi. Meni u chaqirayapti. Men uni yolg‘iz tashlab qo‘yolmayman!

Unday demang, Ortiq aka deb qanchalik yalinib yolvorsak ham, Ortiq aka unsiz yig‘lab yuborar edilar. Bir kuni, -Yuring, Gulsarani qabriga boramiz, Qur’on tilovat qilasiz, bir past o‘sha yerda o‘tirib qaytamiz, dedilar. Bordik. Borsak, - Gulsaraning yonida menga joy bormikin, deb qabr yoniga uzala tushib yotib oldilar. – Turing, Ortiq aka deb, qanchalik yalinib yolvorsakda, o‘krab yig‘layverdilar.

Bugun mana shunday buyuk qalb egasi, buyuk iqtidor va buyuk ovoz sohibi Ortiq Otajonov hammamizni lol qoldirgancha bu ko‘hna olamni tark etdilar.

Ming minglab odamning to‘yida xizmat qilgan, shodlik va quvonch baxsh etgan, hayotlariga zavq va surur ato etgan inson bizni indamaygina tark etmoqda. Bizdan shundoq yuzini burgancha ketib borayapti. Alvido ustoz! Otam kabi mehribonim, otam kabi g‘amxo‘rim alvido! Sizni yaxshi ko‘ramiz! Yuragimizni yulib ketdingiz, alvido! Olloh safaringizni xayrli qilsin! Bizdan Gulsara onamizga salom ayting otajon!", - deb yozgan Muhammad Ismoil.

Manba: Sputniknews-uz.com “Zamin” yangiliklarini “Facebook”da kuzatib boring