Facebook ijtimoiy tarmog‘ida 50 ming so‘m «paynet qilishni» so‘rayotgan firibgarlar paydo bo‘ldi

Facebook’ning Dilnur Kamilov ismli foydalanuvchisi ijtimoiy tarmoqda o‘zini qiz bola deb tanishtirayotgan firibgarlar ko‘payib ketgani haqida post qoldiribdi. Quyida ushbu post to‘lig‘icha keltirilgan.

«Facebook’da chiroyli qizlarning rasmini qo‘yvolib, turli sabablarni ko‘rsatib, aldab tilanchilik qilib yurgan firibgarlar ko‘payibdi.

Avvallari bitta bechorani barchamiz tanib-bilib salkam qarindosh bo‘lib ketgan edik. U bechora yil — o‘n ikki oy perevalda qolib ketgan edi. Ammo u bechora 5000 so‘mgina paynet qilishni so‘rar edi.

Bugunga kelib bu muttaham firibgarlar ham innovatsion bo‘lib ketishyapti. Bir deganda 50 000 so‘m! Tirikchilik yaxshi bo‘lib qolibdiya?

1 kunda 10 kishini qarmog‘iga ilintirsa 500 000 degan gap. 10 kunda 5 million, 1 oyda 15 million.

Ko‘lamini ko‘ryapsizmi?

Qarmoqqa ilintirishning eng samarali uslubi esa chiroyli qizlar rasmi. Hamda faqat erkaklar nishonga olinadi. Hatto yozayotganlarida shevada ataylab yozayotgani ma’lum bo‘lib turadi.

Xullas, aziz do‘stlar! Kimning lichkasiga notanish bo‘lgan, druzyada bo‘lmagan biror qiz kirib, o‘zidan o‘zi dardini aytib, yordam so‘rashni boshladimi, demak u so‘zsiz firibgardir.

Har ehtimolga qarshi ogoh bo‘ling!», — Dilnur Kamilov. “Zamin” yangiliklarini “Telegram”da kuzatib boring