Siz soliq haqida nimalarni bilasiz?

Toshkent viloyatida faoliyat yuritayotgan soliq tizimi xodimlari tashabbusi bilan viloyatning Bo‘stonliq tumanidagi “Barkamol” oromgohida hordiq chiqarayotgan yoshlar uchun “Siz soliq haqida nimalarni bilasiz” nomli viktorina o‘tkazildi.

Mazkur tadbirni o‘tkazishdan asosiy maqsad, yoshlarning bo‘sh vaqtlarini mazmunli tashkil etish, ularning soliqlar xaqidagi bilimlarini oshirish, o‘quvchilar o‘rtasida soliq madaniyatini shakllantirish hamda ularni vatanga muhabbat va sadoqat ruhida tarbiyalashga qaratilgan.

Tadbirni ko‘tarinki kayfiyatda o‘tkazish uchun bayramona bezatilgan oromgoh binosida ushbu maskanda faoliyat yuritgan to‘garaklar ko‘rgazmasi, o‘quvchilarni sog‘lomlashtirish jarayonlari tasvirlangan suratlar, joriy yilda qilingan ishlarni aks ettiruvchi stendlar joylashtirildi.

Tanlov uchta nominatsiya bo‘yicha o‘tkazilib, unda 107 nafardan ortiq o‘quvchi-yoshlar ishtirok etdilar.

1- shart sahna ko‘rinishi bo‘lib, bunda oromgohda hordiq chiqarayotgan yoshlar o‘zlarining aktyorlik qobiliyatini namoyish qildilar. Ushbu shartda Shaxzoda Hakimova, Laziza Mamatxanova, Farzona Sayfullayeva, Nodira Abdurashidova hamda Oybek Isroiljonovlar faol ishtirok etdilar.

2-shart savol-javob sharti bo‘lib, bunda o‘quvchilarning soliq sohasidagi bilimlari sinovdan o‘tkazildi. Savol-javobda Lazizbek Xolbayev, Hikoyatxon Xasanova, Diyor Parmonovlarning faol ishtiroki tahsinga loyiq.

3-shart asfaltga rasm chizish sharti bo‘lib, unda o‘quvchilar baxtiyor bolalik suratlarini tasvirladilar. Bu shartda g‘oliblikni Dostonbek Ortiqboyev va Mo‘’tabar Isroilovalar qo‘lga kiritdilar.

Tadbir so‘ngida 3 ta nominatsiyalar bo‘yicha g‘oliblarga faxriy yorliqlar va esdalik sovg‘alari topshirildi.

“Zamin” yangiliklarini “Instagram”da kuzatib boring