Qonunchilik palatasi: IIVning korrupsiyaga qarshi kurashish bo‘yicha dastur ijrosi qoniqarli emas

Oliy Majlis Qonunchilik palatasi Korrupsiyaga qarshi kurashish va sud-huquq masalalari qo‘mitasi oldiga qo‘yilgan muhim vazifalardan biri davlat organlari va muassasalarida korrupsiyaga qarshi kurashish bo‘yicha ishlab chiqilgan amaliy dasturlarning bajarilishi ustidan kuchli parlament nazoratini amalga oshirishdir.

Oliy Majlis Qonunchilik palatasi Korrupsiyaga qarshi kurashish va sud-huquq masalalari qo‘mitasi tomonidan 2019 yil 9 avgustda o‘tkazilgan navbatdagi yig‘ilishida Ichki ishlar vazirligining 2019 yilning I choragida faoliyati samaradorligini hamda maqsadli vazifalarga erishishni baholashning asosiy mezonlarida ko‘rsatilgan vazifalarni bajarish hamda Korrupsiyaga qarshi kurashish bo‘yicha ichki dasturining ijrosi yuzasidan amalga oshirilgan ishlar to‘g‘risidagi axboroti eshitildi.

Parlament saytida yozilishicha, tanqidiy-tahliliy muhokama etilgan axborotda Ichki ishlar vazirligi tomonidan joriy yilning I choragida faoliyat samaradorligini hamda maqsadli vazifalarga erishishni baholashning asosiy mezonlarida ko‘rsatilgan maqsadli vazifalarning bajarilishi holati, xususan, respublikada o‘g‘irlik jinoyatlarining oldini olish borasida qilinayotgan ishlar to‘g‘risida batafsil to‘xtalib o‘tildi. Shuningdek, vazirlik tizimida korrupsiyaga qarshi kurashish borasida amalga oshirilayotgan chora-tadbirlar xususida ma’lumot berildi.

Biroq eshituv chog‘ida vazirlikning jinoyatchilikka qarshi kurashish hamda 2019–2020 yillarda korrupsiyaga qarshi kurashish Davlat dasturi ijrosi yuzasidan amalga oshirilayotgan ishlari qoniqarli emasligi, bu borada belgilangan vazifalar to‘laqonli bajarilmayotgani qayd etib o‘tildi.

Bundan tashqari, vazirlik tomonidan Oliy Majlis Qonunchilik palatasiga kiritilayotgan qonun loyihalarining sifatini oshirish masalasiga ham alohida to‘xtalib o‘tilar ekan, loyihalar aksariyat hollarda deputatlar tomonidan qariyb 70 foizgacha o‘zgartirilib, qayta ishlanayotgani, korrupsiya elementlari mavjud normalardan xalos qilinayotgani ta’kidlandi.

Tadbirda Ichki ishlar vazirligiga ayni masalalar yuzasidan faoliyatini yanada takomillashtirishga qaratilgan qator tavsiyalar berildi. “Zamin” yangiliklarini “Youtube”da kuzatib boring