Toshkentda bir kunda 722 raqamli o‘nlab Range Rover’larning «nomer»lari majburan almashtirilgan

  • 14 sentyabr 2019, 00:13
  • 4 016
  • Jamiyat
  • Toshkentda bir kunda 722 raqamli o‘nlab Range Rover’larning «nomer»lari majburan almashtirilgan
    Ijtimoiy tarmoqlarda 13 sentyabr, juma kuni davlat raqam belgisi 722 sonidan iborat Range Rover yo‘ltanlamaslari bilan bog‘liq foto, video va ovozli xabarlar paydo bo‘ldi. Tarqatilgan media materiallarda asosan Toshkentdagi to‘y-marosimlarda xizmat ko‘rsatuvchi ushbu qimmatbaho avtomobillarning davlat raqam belgilari yo‘l harakati xavfsizligi idoralarida boshqasiga almashtirilganini ko‘rish mumkin.

    «Daryo» vaziyatga aniqlik kiritish maqsadida Range Rover’ining davlat raqam belgisi 722 dan boshqasiga almashtirilgan haydovchilar va Toshkent shahar IIBB matbuot xizmati bilan bog‘landi.

    Range Rover egalarining fikrlari
    Ikkita Range Rover’i bor fuqaroning «Daryo»ga ma’lum qilishicha, unga 12 sentyabr, payshanba kuni soat 15:00 atrofida yo‘l harakati xavfsizligi idorasidan qo‘ng‘iroq bo‘lib, 722 raqamli Range Rover ishtirokida piyodani urib yuborish bilan bog‘liq yo‘l-transport hodisasi yuz bergani munosabati bilan, birrovga idoraga kelib ketish so‘ralgan.

    Mashinam haydovchida edi. Men: «Xo‘p, haydovchim ishini bitirib aytgan joyingizga boradi», dedim. Lekin u yo‘lda ketayotganida YPX xodimlari uni to‘xtatgan — o‘sha paytda 722 raqamli Range Rover’larni ushlash bo‘yicha reyd bo‘layotgan ekan. Haydovchimning haydovchilik guvohnomasi o‘zining mashinasida qolib ketgan ekan — shuning uchun mening Range Rover’imni jarima maydonchasiga olib kirib qo‘yishgan.

    Ikkinchi Range Rover’imni ham: «Tezda Sergelidagi yo‘l harakati xavfsizligi idorasiga keling, mashinaning raqamini almashtirmasanglar bo‘lmaydi», deb chaqirishdi. Nima sababdan raqamni almashtirish kerak, deb so‘rasak: «Sababi yo‘q, tepadan shunday buyruq bo‘ldi, nomerni almashtirishinglar shart», deyishdi. Men 20:30 ga yetib bordim. Borishimga hamma hujjatlarni tayyorlab qo‘yishgan ekan. Imzo qo‘yib berdim. Mashinaning raqamini yechib olib, boshqasini berishdi va yana 540 ming so‘m pul to‘lashim kerakligini aytishdi.

    «Pul to‘lamayman», desam, raqamni almashtiryapsiz-ku, to‘lashingiz kerak, deb majburan to‘lattirishdi. Birinchi Range Rover’im esa jarima maydonchasida turibdi. Qachon qo‘yib yuborishlarini bilmayman. Aytishlaricha, mashinam nazoratga tushganmish.

    «Daryo» bilan suhbatlashgan boshqa bir Range Rover egasining aytishicha, bir kechada 64 ta 722 raqamli Range Rover’ning «nomer»lari almashtirilgan.

    Kecha shahar yo‘l harakati xavfsizligi idorasidan qo‘ng‘iroq qilib, mashinamni tezda olib borib, tekshirtirishim kerakligini aytishdi. Hozir ishdaligimni, kechroq o‘tishimni aytganimda, jarayon ko‘p vaqt olmasligini, besh daqiqada qo‘yib yuborishlarini aytishdi. Mayli, deb Chorsudagi avtoturargohga chaqirsam, 4—5 nafar YPX xodimi kelib, «GAIga borasanlar, o‘sha yerda rasmga olib, keyin qo‘yib yuboradi», deyishdi va «tex-pasport»imni olib qo‘yishdi. Borganimdan keyin esa majburan 540 ming so‘m to‘latib, raqamimni yechib olishdi va shundan so‘ng «tex-pasport»imni qaytarib berishdi.

    Men mashinam garovda turganini, bank ruxsatisiz uning raqamini yechib bo‘lmasligini aytdim. Lekin YPX xodimlari: «Tepadan shunaqa buyruq kelgan», deb turaverishdi. Bank bilan bog‘lansam, ular: «YPXga ayting, ruxsatimizsiz hech narsa qilmasligi kerak», deyishdi. Sababini tushuntirishmadi. Bank xodimlari ham YPXga qo‘ng‘iroq qilganida ham aytishmadi sababini. Kecha men kabi 64 ta Range Rover’ning raqamini almashtirishgan, hammani 540 ming so‘mdan pul to‘lashga majbur qilishgan. Ularning ko‘pini 722 raqamli Range Rover odam urib yuborgan deb chaqirib olib, so‘ng raqamlarini almashtirishgan.

    Toshkent shahar IIBB nima deydi?
    Hozircha — hech nima. «Daryo» tahririyati 13 sentyabr kuni kunning ikkinchi yarmida poytaxt IIBB matbuot xizmati bilan bir necha bor bog‘lanib, holat yuzasidan izoh olishga urindi, biroq «rasmiy xabarni kuting», degan javobdan ortiq ma’lumot ololmadi. IIV Yo‘l harakati xavfsizligi bosh boshqarmasi matbuot xizmati vakili esa 722 raqamli Range Rover’lar bog‘liq holatdan bexabarligini bildirdi.




    Facebook орқали авторизация
    Ma'lumot

    Посетители, находящиеся в группе Гости, не могут оставлять комментарии к данной публикации.
    » » Toshkentda bir kunda 722 raqamli o‘nlab Range Rover’larning «nomer»lari majburan almashtirilgan