Qorako‘lda sayyor qabul paxta dalasida tashkil etildi (foto)

  • 04 oktyabr 2019, 15:20
  • 584
  • Jamiyat
  • Qorako‘lda sayyor qabul paxta dalasida tashkil etildi (foto)
    Buxoro viloyatining Qorako‘l tumanida sektorlar faoliyatini har tomonlama namunali tashkil etish bo‘yicha o‘zaro hamjihatlikda ish olib borilmoqda. E’tiborlisi, sektor rahbarlarining aholi bilan doimiy ravishdagi uchrashuvlari hududdagi mavjud muammolarni o‘z vaqtida bartaraf etishga xizmat qilayapti.

    Kuni-kecha ana shunday uchrashuv tumanning 4-sektor hududidagi Darg‘ali mahalla fuqarolar yig‘ini Org‘un qishlog‘ida tashkil etildi. Mazkur sayyor qabulning e’tiborli jihati shundaki, unda rahbarlar aholini ortiqcha ovoragarchilikka qo‘ymasdan paxta mavsumini hisobga olgan holda uchrashuvni ushbu hududdagi “Feruza Gulliyeva” fermer xo‘jaligi paxta dalasida tashkillashtirdilar. Fursatdan foydalanib, mehnat qilayotgan hasharchilar huzurida ularning holidan xabar olindi.

    Sayyor qabulning aynan paxta dalasida tashkil etilgani shu yerlik hasharchilardan biri O‘ktam Turdiyev uchun ayni muddao bo‘ldi.
    Uchrashuvda O‘ktam Turdiyev davlat soliq boshqarmasi rahbariyati va tuman hokimi ishtirok etayotganidan foydalanib, tadbirkorlik faoliyatini tiklash uchun ko‘mak so‘radi.

    Ushbu fuqaroning bildirishicha, u bir necha yillar oldin sutni qayta ishlash korxonasini tashkil etgan. Buning uchun kerakli uskunalarni ham xarid qilgan. Ammo, tayyor mahsulotlarini sotishga qiynalgani uchun faoliyatini to‘xtatib qo‘ygan ekan.

    Uchrashuvdan so‘ng sektor rahbariyati va tuman hokimi O‘ktam Turdiyevning korxonasida bo‘lib, uning tadbirkorlik faoliyatini qayta tiklash uchun zarur chora-tadbirlarni belgilab oldilar. Buning uchun eng avvalo uning talabiga ko‘ra tijorat bankidan imtiyozli kredit mablag‘lari olib berishga kelishib oldilar.

    Sayyor qabulda kadastr hujjatlarini rasmiylashtirishda qiynalayotgan Samad Gulliyevning hamda Nabi Safarovning tabiiy gaz masalasidagi murojaati ham shu yerning o‘zida hal etildi.

    Hasharchilardan Umar Cho‘lliyev qishloq aholisini qiynab kelayotgan ichki yo‘llarni tartibga keltirish masalasini rahbarlar oldiga qo‘ydi.
    Yashirishning hojati yo‘q, ushbu muammo tez hal etiladigan masala emas. Shunga qaramasdan, rahbarlar mazkur qishloqning ichki yo‘llarini imkon qadar tez fursatlarda epaqaga keltirish choralarini ko‘rishga va’da berdilar.

    Xuddi shunday aholi nomidan bildirilgan talablardan yana biri -qishloqni kesib o‘tuvchi Org‘un arig‘ining ikki yon tomonini betonlashtirish ishlari ham yo‘l xaritasiga kiritilib, vazifalar belgilab olindi.

    Shu kuni sayyor qabulga kelgan rahbarlar hasharchilarning muammolarini hal etishdan tashqari ularning ko‘nglini ko‘tarish maqsadida shu joyning o‘zida arzon narxlarda oziq-ovqat va boshqaturdagi mahsulotlar yarmarkasini tashkil qildilar. Tibbiyot xodimlari esa hasharchilarning salomatligini ko‘zdan kechirdilar.

    Tushlikda dala boshida terimchilarga osh tortildi. Bir so‘z bilan aytganda rahbarlarning daladagi hasharchilar bilan uchrashuvi samimiy muloqotga aylanib ketdi. Ayniqsa, eng ilg‘or terimchilarning rag‘batlantirilishi ularning kayfiyatiga yanada ruh bag‘ishladi.

    Buxoro viloyati
    DSB Axborot xizmati.

    Facebook орқали авторизация
    Ma'lumot

    Посетители, находящиеся в группе Гости, не могут оставлять комментарии к данной публикации.
    » » Qorako‘lda sayyor qabul paxta dalasida tashkil etildi (foto)